Nnbi Nuḥ
Amazzan n usizref i d-iteddun
Iɛaac Nuḥ d imeyyaten n iseggasen deffir Kahin d Habil. Deg iseggasen-agi yeggten, d igiman n yemdanen i d-yusan ɣer ddunit. Imdanen-agi yettidiren di lqaɛa ur d-cqiɛen ara akk deg Illu, xeddmen kan di cceṛ. Ass mi d-illul Nuḥ, ddunit tella deg yir liḥala. Imdanen nherwen xeddmen ḥala deg yir lecɣal. Akken yella di Tira:
"Iwala Umeɣlal cceṛ xeddmen yemdanen meqqeṛ di ddunit, ixemmimen meṛṛa n wulawen-nsen ttmilin yal ass ɣer cceṛ... Dɣa yenna Umeɣlal: Ad snegreɣ si lqaɛa amdan i d-snulfaɣ... Lameɛna yufa Nuḥ lemzzeyya ɣer Umeɣlal. Nuḥ di zzman-is, yella iteddu s ṣṣwab d teɣdemt; ileḥḥu Nuḥ aked Yillu... Immuqel-d Ṛebbi lqaɛa, yufa-tt temterwi; yal lǧetta tetteddu tefsed di lqaɛa. Dɣa yenna Ṛebbi i Nuḥ: Qesdeɣ tagara n yal amdan; axaṭeṛ ččuren ddunit s tekṛiṭ; atah, a ten-snegreɣ aked lqaɛa."
Yenna Yillu i Nuḥ ad yebnu afniq (aɣeṛṛabu meqqren). Ihegga-d Ṛebbi iwakken Nuḥ d twacult-is ad izmiren ad sellken seg usizref-nni ara d-yeɣlin ɣef ddunit. " Yexdem Nuḥ ayen akk i s-d-yumeṛ Umeɣlal " i d-nnant Tira. Mi akken yella issebdad afniq, yettmeslay i yemdanen i s-d-yezzin, inehhuten ɣef usizref n Yillu i d-iteddun. Yeqqar-asen belli Ṛebbi d uɣdim, degmi ara yessenger imdanen ɣef ddemma n ubekkaḍ-nsen. Ilaq-asen ad wexren ɣef ddnub-nsen, ad uɣalen ɣer Yillu iwakken ad iḥun fell-asen. D acu kan, ur ssmeḥsen ara i yini-ines, ur bɣin ara ad qeblen nnehwat-ines. Llan stehzayen ɣef nuḥ, ttaḍsan fell-as.
Mi yekfa Nuḥ lebni n ufniq-nni, yenna-yas Umeɣlal: "Kcem s afniq, s kečč s wexxam-ik, axaṭeṛ walaɣ-k d aḥeqqi zdat-i, di lǧil-agi".
Ur yebɣi ara Yillu ad yessenger akk iɣersiwen d leḍyur. Iwakken ad yeḥrez ṣṣenf-nsen, yumeṛ Yillu i Nuḥ ad yeddem yid-s ɣer ufniq tayuga si yal ṣṣenf n iɣersiwen d leḍyur. Mi kecmen s afniq, Nuḥ, tmaṭṭut-is, arraw-is di tlata yid-sen d tlawin-nsen, yemdel Yillu tawwurt n ufniq. Nuḥ, tawacult-is d iɣersiwen-nni atnan tura daxel n wefniq. Wid akk yestehzayen s yizen n Nuḥ qqimen di berra.
Ass n usizref n Yillu yusa-d. Yeɣli-d ugeffur seg igenni d iḥemmalen. Lqaɛa meṛṛa teččuṛ d aman. D affal n waman. Imdanen regglen ɣer idurar d tɣaltin. Ma d Tira qqarent-d: "... idurar akk ɛlayen yellan seddaw igenni meṛṛa ɣummen... ayen iteddu ɣef lqaɛa yenger, ama d leḍyur, d lmal neɣ d iɣersiwen, ayen akk iteddun ɣef uɛebbuḍ di lqaɛa, d yemdanen meṛṛa".
Acuɣer i yexdem akka Yillu i yemdanen? Ɣef ddemma n ibekkaḍen-nsen i d-yeɣli fell-asen uzaraf. Ttwamerten. Imi ur smeḥsen ara i Nuḥ, negren meṛṛa. Ḥala wid ikecmen ɣer wefniq i yettwaselken si lmut iweɛren, i d-iceggaɛ Yillu ɣer ddunit. Nuḥ d twacult-is ufan tadarit deg ufniq. Tenger talsa di lawan-nni, seg akken tedneb yerna ur tessemḥes ara i nnehwat n Yillu.
Azaraf-agi n Yillu, affal n waman, yewwet-d imdanen yessedrem-iten, ma d wid akken yellan daxel n wefniq, netni dduran, selken. D ageffur-nni d-yeɣlin ɣef lqaɛa, i d-yeɣlin ɣef wefniq, d acu kan wid yellan daxel n wefniq, llan di laman. Mi d-yeffeɣ Nuḥ seg ufniq, iɛuhed Yillu ur yuɣal ad yessenger ddunit s waffal, lameɛna ad yessizref imdanen ɣef ibekkaḍen-nsen, ɣer tagara n ddunit.
Ad imerret Yillu wid akk i denben mgal-is. Lameɛna yewjed ad isuref i wid yettqirrin s ddnub-nsen. Imdanen meṛṛa ccḍen mgal Yillu. Imi i tdenbem, ad yeɣli fell-awen uzaraf n Yillu. Ḥala mada gella txedmem am Nuḥ, a ttnadim tadarit mebla laɛḍil. Ihegga-yawen-d Yillu tadarit. Tebɣam a tt-tissinem iwakken ad ttemnam seg zaraf n Yillu? Kemlet ihi taɣuri.
Tura, uqbel a ttaẓem ɣer zdat, arret-d ɣef umesteqsi n temsirt-agi
