Adem d Ḥewwa werǧin i d-lulen, ttwaxelqen-d ssrid sɣur Yillu.
Imdanen nniḍen akkit ttasen-d ɣer ddunit d llufanat, ttlalen-d seg imawlan-nsen. Mačči akka i yella lḥal d wergaz amezwaru aked ttmeṭṭut tamezwarut.
Ass wis setta n usnulfu, yeddem-d Ṛebbi aɣebbar seg akal, ixdem-d argaz. Iṣuḍ di tenzarin-is s nnefs n tudert dɣa yuqel wergaz-nni d amdan yeddren. Isemma Yillu i wergaz-agi Adem. Swakka yettwaxleq-d Adem sɣur Ṛebbi.
Imi i ywala Ṛebbi ur yelhi ara ad yili wergaz weḥd-s, yeqsed a s-d-yefk tamɛiwent.
Yessers-d Ṛebbi iḍes meqqren ɣef Adem. Mi yella iggen, Yeddem-d Ṛebbi iɣes seg beṛḍi n Adem, yerra ixaḍ taksumt n wemkan-nni. Seg iɣes-agi ubeṛḍi, ixleq-d Ṛebbi tameṭṭut, yewwi-tt-id ɣer Adem. Isemma Adem i tmeṭṭut-is Ḥewwa.
Yeẓẓa Yillu tibḥirt, yessers deg-s argaz-nni d tmeṭṭut-nni. Yenna-yasen: " Arwet, ffutkit, ččaret ddunit tesxedmem-tt; Ḥekmet ɣef iselman n lebḥer, ɣef yegḍaḍ n igenni, ɣef yal aɣersiw iteddun di lqaɛa". Yewwi-d Ṛebbi iɣersiwen d yegḍaḍ ɣer Adem. " Dɣa isemma wemdan, i lmal, i yegḍaḍ n igenni d iɣersiwen akk n tẓegwa ".
Di tebḥirt-nni i deg yettili Adem d Ḥewwa, llan atas n waddagen icebḥen. Yefka Ṛebbi lameṛ-agi i Adem: " Tzemreḍ a tteččeḍ seg addagen akk n tebḥirt; d acu kan ur tetteḍ ara seg addag n tmusni n lxir aked cceṛ ". Ɣer Adem d Ḥewwa lxedma n tebḥirt-nni, zemren ad ččen akken i sen-yehwa seg addagen meṛṛa n tebḥirt, ḥala seg addag-agi. (addag n tmusni n lxir aked cceṛ)
Cciṭan yella deffir yal cceṛ, tikkerkas d wayen n diri. Issekcem deg-sen ccek, ɣef Awal n Yillu, iwakken ad ččen seg addag-nni: " Ad yelli yeẓri-nwen, ad ttuɣalem am Ṛebbi ", i sen-yesmermeg. Issedha-ten cciṭan s tiḥila-ines.
Akken kan i ččan si lfakya-nni, wwin-d s lexbaṛ belli d iɛeryanen i yellan. Bdan ẓeṭṭen-d afriwen n waddag iwakken ad ṣṣren iman-nsen. Di teswiɛt-nni i deg ččan seg addag-nni, ur uɣen ara awal i Ṛebbi. D abekkaḍ. Ayen akk ur neɛdil ara aked lebɣi n Ṛebbi yili d abekkaḍ. Imi ur uɣen ara awal i Ṛebbi, Adem d Ḥewwa uqlen d imednuben.
Yessawel-as-d Yillu i Wergaz-nni, yenna-yas:
"Eɛni teččiḍ seg addag-nni, win akken ɣef i k-weṣṣaɣ ur tetteḍ ara seg-s ?"
Yerra-d wergaz-nni: " tameṭṭut-nni i d-tewwiḍ ɣer tama-w, tefka-yi-d seg addag-nni, dɣa ččiɣ-d".
Dɣa yenna Yillu i tmeṭṭut: " ayɣer i txedmeḍ akka ? "
Terra-yas-d tmeṭṭut-nni: " Iɣuṛ-iyi Cciṭan dɣa ččiɣ-d ".
Yelɛen Yillu Cciṭan : " A d-sserseɣ tiɛdawit ger-ak d tmeṭṭut, ger dderya-k d dderya-s, nettat a k-temḥeqq ixef, kečč a s-t-jeṛḥeḍ agerz ".
D abecceṛ yesɛan azal meqqṛen. Cfut-as: A t-nwali ɣer zdat, ad yennekmal.
Ur s-ɛǧiben ara i Yillu iceṭṭiḍen-nni i d-xedmen Adem d Ḥewwa s wafriwen iwakken ad ṣṣren iman-nsen. S lecɣal-nsen ahat ffren kan ṣṣura-nsen taɛeryant, lameɛna ur zmiren ara ad ṣṣren abekkaḍ-nsen. Yenɣa Yillu yiwen uɣersiw, s teglimt-is tura ara ɣummen iman-nsen, argaz d tmeṭṭut-nni.
Imi i s-fɣen abrid, Ṛebbi iqeccɛ-d si tebḥirt-nni Adem d Ḥewwa. Yuqel Adem ixeddem s leɛtab, ikerrez akal iwakken ad yessufeɣ aɣrum-is. Aɛaṣṣi-yagi n yiwen wemdan yeṣṣaweḍ talsa meṛṛa tuqel d tamednubt. " Degmi, imi s yiwen wemdan ddnub ikcem-d ɣer ddunit, swakka lmut tḥuza imdanen meṛṛa, axaṭer denben meṛṛa... ".
Nekni akk d arraw n Adem. Am netta, neffeɣ akkit i webrid n Yillu. Ur nexeddem ara deg ayen yelhan. " Debnen akkit ". Am Adem, nuḥwaǧ ɣer twaṣṣra. Yeɣli uɣersiw iwakken ad iɣumm Adem aked Ḥewwa, s teglimt-nni ad ṣṣren. Ula d nekni tlaq-aneɣ tduli, twaṣṣra i yibekkaḍen-nneɣ.
Ṭṭfet di tɣuri-nwen, iwakken a ttfehmem amek i d-ttunefk tduli-agi sɣur Ṛebbi i yemdanen meṛṛa.
Tura, uqbel a ttaẓem ɣer zdat, arret-d ɣef umseqsi n temsirt-agi.
