Ayen akk i wumi nsel deg iseggasen-agi akk ineggura, d imagara, d imennuɣen, d lehlak d yal tawaɣit, di yal tamnaṭ n ddunit. Irennu di tugdi n waṭas n yemdanen. Am akken ahat nettḥussu tqerb-d tagara n ddunit. Nesla di lemtel, di tmurt n Marikan, yerna deg useggas-agi, kra n yemdanen deg akken ṭeḥqen belli tewweḍ-d tagara, bdan teddun si temdint ɣer tayeḍ, ssawaḍen isallen ɣef tagara n ddunit. Ttarun-d deg iɣmisen-nsen, ssawaḍen-d ama di rradyu ama di tiliẓri d lanṭirniṭ.
Nezmer a d-nini, tugdi d uḥiri, deg ayen yeɛnan tamsalt-agi n "tagara", d ayen d yettilin deg yegduden meṛṛa, deg aṭas n teswiɛin deg umezruy. Di yal lawan i deg ara teḥres, i deg ara d-ilin yemgara d twaɣiyin d iɣeblan meqqren, yili-d usekkud-agi ɣef "tagara".
A d-nini daɣen, si tama n ddeyyanat, ayen yeɛnan " tagara" yeddukel di liman n yemdanen. Ula ɣer imassanen si yal tamusni d usfelsef. Si yezri ibeɛden, seg yegrigiyen, alamma d akuden itraren, anadi ɣef temsalt-agi yecqa talsa meṛṛa.
Tudert d lmut, d sin wudmawen n yiwet n tilawt. Akken d tella tazwara ara d tili "tagara". D acu kan di yal ddin neɣ asfelsef, d amek ttwalin lameṛ-agi. Nezmer a d-nin ahat, yexleḍ usirem d tugdi, deg ul n yal amdan mi ara yessiked ɣer temsalt-agi n "tagara".
Di linǧil n Matta, deg adlis n lɛehd ajdid, mi akken i d-yeǧǧa Lmasiḥ lameṛ i yinelmaden-is, ad ruḥen yer ddunit meṛṛa ad ssiwḍen isallen n leslak, yenna-yasen : " ad iliɣ yid-wen alamma d tagara n ddunit " ( Mat 28:20 ). Deg adlis n Uweḥḥi, yenna-d Lmasiḥ: " d nekk i d amezwaru i d aneggaru, d nekk i d tazwara, i d tagara " ( Aweḥḥi 22:13 ). Tiɣri-agi n Lmasiḥ tcudd ɣer wayen akk yesnekmal i leslak n yemdanen. Asfel yettunefk ɣef umidag, d ḥeggu-ines si ger lmeggtin, d " tazwara n tagara" n tzemmar n ṭṭlam d cceṛ.
S wudem n wayen i ɣ-yella Lmasiḥ, tikta-agi n tagara, ad aɣ-tili d asirem. Imi d netta i d tazwara i leslak-nneɣ. D netta daɣen i d tagara. Axaṭeṛ a d-yuɣal di tmanegt-ines s tezmert d tnaya. A d-yeglu s teɣdemt d lehna. Talwit d usirem.
Ihi yewwi-d lḥal, a neḥrez taflest-nneɣ, laman-nneɣ di Lmasiḥ i ɣ-yellan d amsellek.
D netta i d tazwara, i d tagara. Yewwi-d lḥal a neḥrez asirem !
