D acu-t yizen n Tira?Amek ara nefhem izen n Tira?

Tira iqedsen, ama d lɛehd ajdid ama d lɛehd aqdim, d awal d lewṣayat d yeǧǧa Yillu i yemdanen. Ayagi meṛṛa yennejmaɛ-d deg yiwen n wedlis yettusemman Adlis n Tira Iqedsen. S tefransist qqren-as i wedlis-agi, "La Bible". D ameslay i d-yekkan si tegrigit d tlaṭinit, "Biblia". Anamek-ines, "Adlis".

Deg "Adlis" anaf amezruy n usnulfu n ddunit aked talsa. D tikli n umezruy n talsa aked yiswi i ɣer tetteddu. Si tazwara yessers-d Yillu tamsisit aked wemdan i d-yesnulfa. Yessers-d lemɛahda n tudert yid-s. Yefka-yas-d i wemdan tazmert aked tigzi iwakken ad yexdem ad yesfukti ayen ɣef t-iwekkel si tazwara. Nezmer a d-nini tagi d tamsisit tamezwarut, d tin n lxedma, d lecɣal-nni ɣef i t-iwekkel. Amdan yettidir deg assaɣ aked Yillu. S lecɣal akk i yxeddem, iḍuɛ Illu, iteddu ddaw leɛnaya-s.

Si tedyant n ɣelluy n wemdan, makken i yecceḍ, ur yuɣ ara awal i Ṛebbi, tbeddel liḥala n talsa. Am akken yeṛṛeẓ wassaɣ-nni yellan ger Yillu d wemdan. Tbeddel daɣen temsisit yellan ger Yillu d wemdan. Yuqel wemdan ur yezmir ara ad yeɛǧeb i Yillu s lecɣal-is d ixemmimen-is, imi umsen si ddnub.

Ɣelluy n wemdan d ddnub d twaccḍa. Yuqel wemdan yeqquṛ wul-is, umsen ixemmimen-is, ur yezmir ara ad yefreẓ lebɣi n Yillu. Yebɛed ɣef lebɣi-s, yennexṛab ula d iswi n tudert-nni ɣer i s-d-issawel si tazwara. Yuqel wemdan yettmenṭaṛ, icuba ɣer lmal mebla ameksa.

Sidi Ṛebbi, a d-iheggi leslak i wemdan. A d-inadi ɣef talsa. S wawal-is d imceyyɛen-is di yal tasuta. D leslak ara yennekmalen di Lmasiḥ. S ṛṛeḥma d leɛfu ara ysellek imdanen. Degmi tamsisit-agi tajḍiṭ tettusemma d tamsisit n ṛṛeḥma. Yi-s yessawal-d i talsa meṛṛa iwakken ad taf abrid n leslak. Iwakken ad uqel tejlibt ɣer leɛnaya n umeksa-ines.

Tamsisit-agi ad taɣ aẓar segmi d-yeffeɣ Adem si tebḥirt n Ɛiden alamma d talit i deg ara d-ibin Lmasiḥ. Seg zimer-nni yemmuten iwakken ad teṣṣaṛ talsa tamezwarut, d lemɛahdat yexdem Yillu aked yemɣaren imezwura, am Nuḥ d Yebrahim. Ad tennerni d tamsisit ara yesbedd d Wat Israil, s imceyɛen d igelliden, alamma d Yeḥya Aɣeṭṭas.

Izimer-nni amezwaru yeggar-d tiɣri i Lmasiḥ, netta yellan d izimer-nni i ɣef yella Yeḥya d anagi. D izimer ara yekksen  abekkaḍ n talsa. D netta ara yeṣṣren talsa. D asfel ara yettwaqeblen ɣer Yillu i wsuref d leɛfu n ddnub n yemdanen. Tennekmal temsisit n ṛṛeḥma di Lmasiḥ. Tikci n tudert. D leslak. D tudert n dayem i kra n win yumnen yis.


Commentaires (0)



Pour ajouter un commentaire il faut être membre du site