Illu yellan d anezmar,  amek ara d-ilal si tmeṭṭut?Illu yellan d anezmar, amek ara d-ilal si tmeṭṭut ?

D yiwen seg adrigen n teflest tamasiḥit. Imi Tira Iqedsen hedrent-d ɣef Yillu i d-ibanen di talsa di lǧetta n Mmi-s, yellan d Lmasiḥ. Illul-d si Meryem, yusa-d ad yili d amsellek n yemdanen. S lmut-is d ḥeggu-ines ass wis tlata si ger lmeyytin. D sser meqren ! Ṛebbi anezmar a d-ibin deg umdan-nni ara d-ilalen si tmeṭṭut !

Ger ṣṣifat n Ṛebbi, netta d-yekkan nnig kullec, d netta i d-yefkan tudert d ddunit meṛṛa.Tamusni d netta, akud d wakal, kullec sɣur-s i d-yennulfa. D bab n tezmert d agellid ameqran. Tanaya-ines ɣef umaɣrad d umezruy. S wazalen-agi, i nezmer daɣen a d-nini, yezmer ad yexdem ayen i s-yehwan, melmi i s-yehwa, akken i s-yehwa. Sser n tudert ɣur-s i yella.

Tira Iqedsen, wwint-d ɣef tlalit n Lmasiḥ yellan d tazmert n Yillu s Ṛṛuḥ-is. S tmusni-ines yugaren kra yellan d tamusni, s tegzi-ines yugaren kra yellan d tigzi, s tezmert-is ur nesɛi tilas, yeqsed a d-yas ɣer talsa di lǧetta n wemdan. Akka i yella di lebɣi n Yillu, di tnaya-ines.

Sidi Ṛebbi ibeggen-d iman-is ger yemdanen di Lmasiḥ. S tlalit-ines si Meryem s tezmert n Ṛṛuḥ Iqedsen. Talalit n Lmasiḥ d tazmert d lberhan n Ṛebbi. Lmasiḥ iɛac d amdan am netta am talsa meṛṛa. D acu kan zeddig, werǧin yecceḍ. S tezmert n Ṛṛuḥ iqedsen i yteddu i yesselmad i yettidir. S Ṛṛuḥ i yesnekmal ccɣel-ines, yettunefk d asfel ɣef ibekkaḍen n yemdanen iwakken a d-yessers talwit ger talsa d Yillu. Imi abekkaḍ yuɣ talsa meṛṛa. Ḥala asfel zeddigen ara d-yasen sɣur Yillu s yiman-is, ara yizmiren ad yefru taluft-agi n ddnub.

D sser meqqren, d tamusni lqayen, d ayen umi ur yezmir wemdan a t-yefhem s tegzi-ines kan d tmusni-ines kan. Imi amdan akken yebɣu yessen, akken yebɣu yefhem, tamusni-ines txuṣ, lefhama-ines ur teṣṣawaḍ ara ad tmeyyez lesrar n wayen akk ixeddem Yillu.

Di Tira ara naf ayen yeqsed Yillu di lebɣi-ines. D Tira i d lsas n teflest deg ayen akk ixeddem Yillu. Aẓeṭṭa akk n Tira, si tazwara alamma d tagara, d amek i d-ibeggen iman-is i talsa. Akka ara neɛqel lebɣi-ines i tudert n yal amdan d leslak i yewɛed di Lmasiḥ. Iswi n Yillu d leslak n wemdan si ddnub d lmut.

Azal aazizen akk di ccɣel n Yillu, d leḥmala. Deg akken iḥemmel talsa i d-yexleq ɣer tugna-ines, ɣer ṣṣifa-ines, yusa-d ɣur-s di Lmasiḥ. Iɛac yid-s, yella-yas d tafat, d ameksa, yeṛẓa zdat-s asalu, injeṛ-as-d abrid i leslak. Linǧil n Yuḥenna yura-d aṭas ɣef Lmasiḥ yellan d tafat n ddunit, d ameksa lɛali, d abrid d ttidett d ttudert. (Yuḥenna, ixf 8, ixf 10, ixf 14). Akka i d-ban tezmert n Yillu d leḥmala-ines ɣer yemdanen. Yefka-d Mmi-s ɣer ddunit iwakken s kra n win yumnen yis ur ifennu ara, lameɛna ad yesɛu tudert n dayem ! (Yuḥenna 3:16).


Commentaires (0)



Pour ajouter un commentaire il faut être membre du site