D acu-t wazal n ḥeggu n Lmasiḥ? Tadyant n ḥeggu n Lmasiḥ si ger lmegtin d tin ara yebnun asirem n teflest. D lewhayem, mačči d ayen ara yeqbel leɛqel. D tazmert n Ṛṛuḥ Iqedsen i d-issekren Lmasiḥ si lmut. D afus n Ṛebbi ara d-yennalen tudert. A tt-id yerr i Lmasiḥ, ad tfeggeḍ, a d-nfel ɣef wid meṛṛa ara yamnen s Lmasiḥ.

Akken d-yura di Tira Iqedsen, ilaq Lmasiḥ ad yemmet d asfel ɣef ddnub n yemdanen, ass wis tlata a d-yeḥyu si ger lmegtin. Lmasiḥ ilul-d, iɛac mebla ddnub. D azedgan. Ur s-zmirent ara tuccar n lmut a t-ṭṭfent. Axaṭeṛ lmut d lexlas n ddnub. Makken yemmut Lmasiḥ yef umidag, d asfel i yettunefk, ixelles taluft n ddnub. S lebɣi-s i yeqbel ad yeṭṭef amkan n imednuben. Yenna-t-id s yimi-s : "Sɛiɣ adabu ad fkeɣ tudert-iw, sɛiɣ daɣen adabu iwakken ad tt-id-rreɣ!" (Yuḥ 10.18). Deg mi tura ara d-icafeɛ ɣef kra n win yumnen yis.

Ḥeggu n Lmasiḥ yessew azal n wesfel-ines ɣef umidag, yesǧuǧeg-it. S tedyant-agi n ḥeggu, tban-d lqima n umidag, azal n ccɣel n Lmasiḥ, d leslak ara d-iḥaṛ i yemdanen. Axaṭeṛ, lukan ur d-yeḥya ara Lmasiḥ si lmut, ttbut n umidag ad ixaṣ, ad irab lsa-is. S unamek nniḍen, ad nini, s ḥeggu n Lmasiḥ i d-yessers Yillu ṭṭabeɛ-ines ɣef azal n umidag, ɣef tidett d tezmert n wesfel n Lmasiḥ. S ḥeggu n Lmasiḥ i yettwaqbel wesfel-ines, ttwaqeblen idammen-ines zeddigen ara ɣ-iṣefḍen abekkaḍ, ara ɣ-d-issuksen si tezmert n lmut.

Ihi, lmut n Lmasiḥ d ḥeggu-ines, d snat n tedyanin yesbedden yiwet n tilawt. D ccɣel n Yillu i leslak n yemdanen. S ḥeggu n Lmasiḥ i nesɛa ula d nekni tura asirem i tudert-nneɣ, i ḥeggu-nneɣ. Di lǧeṛṛa n Lmasiḥ ara newṛet ula d nekni tudert-is d ḥeggu-ines. Akken t-id yenna umceggeɛ Bulus deg yiwet si tebratin-is. Tabṛatt i Wat kurintus (1 Kur 15).

D tadyant-agi n ḥeggu n Lmasiḥ, yellan d tidett n umezruy, i yefkan tissas d lǧehd i yinelmaden imezwura. S ḥeggu n Lmasiḥ ara d-yers Ṛṛuḥ n Ṛebbi ɣef wid meṛṛa yumnen, ɣef yemcegɛen iwakken ad ṣṣiwḍen izen n leslak. Ad sbedden lsas n tmezgida d teflest. Zemren ad qablen aqehheṛ d teɛṣirt, ulawen-nsen ččuṛen d ṭmana d lehna. Tazmert n ḥeggu n Lmasiḥ d afud-nsen, d asirem-nsen. D asirem i ɣelben lmut! D wagini i d sser n teflest tamasiḥit. Di lawan-nni, amenkud n Ṛṛuman d uzzal, ma d tazmert n imcegɛen n Lmasiḥ d liman-nsen yessew deg-sen Ṛṛuḥ n Ṛebbi.

Yenna-d Lmasiḥ deg awal-is: " D nekk i d abrid i d tidett i d tudert " (Yuḥ 14).


Commentaires (0)



Pour ajouter un commentaire il faut être membre du site