Yal amdan yettnadi ad yamen!
Ulac amdan di ddunit, si sik ar tura, ur nuzzel ara ɣer ddin. Yalukan a t-id yesnulfu s ixemmimen-is. Tikwal a t-nwali iteddu si ddin ɣer wayeḍ, si lɛadda ɣer tayeḍ, seg xayel ɣer wayeḍ. Amdan yezga yettnadi amek ara yaf liser d ṭmana i tudert-is d laxeṛt-is. Amdan d adeyyani. Yuḥyaǧ ad yamen s kra n “urebbit”, s kra n “tezmert”. A ten-yeɛbed, a d-yessirem ɣur-sen iwakken ad yaf iswi d unamek i tudert-is.
Deg mezruy n talsa meṛṛa, a naf deyyanat d nutenti i d-yeglan s waṭas n yemgarayen d lxilaf ger yemdanen, ger leǧnas, ayagi si tama. Daɣen a tent-naf d nutenti I yesseddayen lumuṛ n tudert d ttmeṭṭi s umata. S iṣuḍaf, d uselmed di tikli ara yreṣṣin lehna d tenfalin I yemdanen. A nwali ihi, sin wudmawen-agi, ɣas mada gella mxallafen, ttekkan deg yiwet n tilawt, tin n ddin.
Yal amdan yettnadi ɣef tifrat d lehna!
Imdanen ttafen di ddin talwit I wmennuɣen-nsen, zzaǧawen asirem, zdat timsal akk n dunnit, zdat tugdi n lmut. Degmi I d-llan meṛṛa iberdan n ddin. D iberdan ideg ssaramen a d-mlilen tifrat d usirem.
S ddin I yettnadi wemdan ad yaff lehna, ad yamen s Ṛebbi. Ad yerr tilisa I werway n tudert-is. D acu kan, yal amdan d akken yettxemmim, d akken d-yettmettil s lefhama-ines, amek yella Ṛebbi, amek tella tezmert-is, d wamek ara yeman-yis. D wagi, a d-nini I d sser n deyyanat d lxilaf yellan ger-asent. Uggtent deyyanat di dunnit. Axaṭeṛ yal amdan, yal lǧens, yettnadi amek ara yaf allalen d webrid ara yeḍfar, iwakken ad yemlil s wayen i s ara yamen, iwakken ad yefk anamek i tudert-is, d yimal.
D acu kan, akken yebɣu wemdan inuda ad yemlil d Ṛebbi, mazal aṭas fell-as. Imi iḍul umecwar. Tidderɣelt n ddnub ur teǧǧi ara amdan ad iwali tidett icudden ɣer Yillu. D wagi I d aɣbel. Tifrat mačči seg umdan d ixemmimen-is ara d-tekk. D lameṛ-agi ur fhimen ara yemdanen, armi zgan ttnadin ad afen abrid s deyyanat d tmusni s umata.
D lmasiḥ I d tasarut I tudert n wemdan!
Tifrat nettat, tekka-d sɣur Ṛebbi s yiman-is. Iweḥha-d iman-is I yemdanen, s lebɣi-s netta. S wawal-is d lumurat-is I d-yeǧǧa I talsa. Liman amasiḥi yebna s lsas-agini. D Ṛebbi yedren, I d-yemmeslayen I talsa. Yusa-d ad yezdi tadukli d yemdanen I d-yexleq. D Ṛebbi s yiman-is I yettnadin ad isellek amdan si ddnub d yir liḥala I deg yella. Yefka-d Lmasiḥ iwakken ad yili d alemmas ger-as d yemdanen. A ten-yessemṣalaḥ yid-es. Ad sen-yekkes taɛkumt-nni n ddnub I ten-iferqen, I ten-isbeɛden fell-as. D lmasiḥ I d-yessersen talwit ger yemdanen d Ṛebbi. Yis I d-tefeggeḍ leḥmala n Ṛebbi ɣef dunnit. D wagi I d leslak, I d abrid.
