dating-nt-booksAmidag n Lmasiḥ ɣer useggas n 30

D ayen yellan deg umezruy, aṣemmer n Lmasiḥ ɣef umidag yella-d di leǧwahi n useggas wis 30 n talit-nneɣ. D ayen ara naf deg adlis n Luqa (Luq 3:1). Yettawi-d ɣef leqdic n Yeḥya Aɣeṭṭas i d-yusan kra n lweqt kan uqbel taɣlift n Lmasiḥ. Ayagi meṛṛa yella-d di lawan i deg yeḥkem Tiberyus. D aseggas wis 15 n tgelda-ines. Tebda tgeldit-ines deg seggas n 27 n talit-nneɣ. Tiberyus yuqel d amenkad deg seggas n 14, deg aggur n ɣucṭ. Tlata iseggasen ara yeḍrun di tneɣlaft n Lmasiḥ, alamma d lɛid n izimer, tafeska-nni tis tlata ara d-yilin deg useggas wis 30. Dinna ara d-ili tedyant n umidag.

Di lawan-nni daɣen, Bilaṭus yella yeḥkem yef temnaṭ n Yahuda. Hirudus yeḥkem di temnaṭ n Ǧlili. Ma d Kayif netta yella d lmuqeddem ameqṛan n at Israil di teswiɛt-nni.

Aqel-aɣ deg useggas wis 30. D tanagit n umezruy. Di lawan n umenkud n Ṛṛuman yellan yeḥkem meṛṛa ɣef temnaḍin d-yezzin i yil agrakal.

Adlisen n "Lexbaṛ n Lxir", "Lecɣal" d "Uweḥḥi"

Ma d ayen akkit yuran deg adlisen n Lɛehd Ajdid, d titeggrin ara yilin teddunt yakan ɣer useggas n 100, n talit-nneɣ. Nezmer a d-nini, tuggett n yeḍrisen-agi, llan yakkan wejden, si 20 ɣer 40 iseggasen uqbel-aya. Aḥric ameqran n imusnawen n Tira d umezruy, gren-d awal ɣef lawan i deg uran yedlisen-agi meṛṛa n Lɛehd Ajdid. Ma nesɣerbel di tiktiwin akk nsen d wazalen ssexdamen iwakken a d-efken ussan d iseggasen n yal adlis, nezmer a d-nini belli uran-d yeḍrisen-agi ger useggas n 48 alamma d aseggas n 100. Deg akud-agi ara d -yili leqdic n tira n yeḍrisen, sɣur yemyura yemxallaen, ger inemladen imezwura, d wid d yernan ɣer zdat.

Adlis n Merqus yura-d ger tama useggas n 60. Adlis n Luqa yezmer ad yili yura-d ger useggas n 60 d useggas n 70. Ma d win n Maṭṭa ad yeṣbeḥ yer leǧwahi n useggas n 70.

Aseggas-agi n 70, deg-s i d-yeḍra wedram n temdint n Yirucalim aked ufakan n wat Israil, ddaw tiyyita n udabu n Ṛṛuman. Linǧil n Yuḥenna i d-aneggaru yuran, ger 90 d 100. Ula d adlis-nni d-yura, n "Uweḥḥi" ad yili ger tagara n lqern. Yella di lawan-nni Yuḥenna yenfa ɣer tegzirt n Batmus.

Adlis n "Lecɣal n Yemceggɛen" i d-yura Luqa s yiman-is, ad yili ɣer tama n useggas n 60, ahat ɣer 62. Di lawan-nni Bulus yella di lḥebs di temdint n Ṛuma. Yuɣ lḥal, Luqa yellan d ameddakel-is, yura-d aṭas fell-as, ɣef yinigen-is d tedyanin meṛṛa i yella yettɛici deg-sent.

Tibṛatin n Bulus aked tiyyiḍ

Neẓra belli Bulus yura-d 13 n tebṛatin. Lawan i deg ten-t-id yura a t-naf deg mezruy, di leqdic-ines, ger yinigen-ines, di tira-ines. Ger tebṛatin-agi, ɛecra deg-sent yura-tent uqbel tagara n lḥebs-is di Ṛuma. Yebda tira ger useggas n 48. Deg seggas-agi ara d-ili tebṛatt yura i wat Galasya. Tabṛatt tis nat i wat Tisalunik ɣer useggas n 50. Tabṛatt i wat Filibus ɣer useggas n 54. Snat-nni n tebṛatin i wat Kurintus ger useggas n 54 d useggas n 56. Tabṛatt i wat Ṛuma deg seggas n 57. Ɣer useggas n 60, yura daɣen tibṛatin nniḍen, i wat Kulus, i wemdakel-is Filimun, aked tebṛatt-nni i wat Ifasus. Ma d tibṛatin nniḍen ad ilint ger useggas n 60 d 64, ɣer tagara n tudert-is. Yuɣ-it lḥal yettwaḥbes di temdint n Ṛuma. Yerna ḥekmen fell-as s lmut.

Butrus daɣen yura-d snat n tebṛatin. Ad ilint urant kra n lweqt kan uqbel tamettant-ines ula d netta. Ger useggas n 62 d useggas n 64. Yemmut Butrus d ameɣras ddaw taɛṣirt n umnkad "Nirun" yellan d uqsiḥ ɣer imasiḥiyen di lawan-nni.

Tella daɣen tebṛatt n Yeɛqub yuran ahat uqbel aseggas n 50. Imi neẓra belli netta daɣen yemmut d ameɣras di Yirucalim. Kran lqewt kan yerna ɣef Stifanus win akken reǧmen wudayen. Ayagi akk yeḍra-d uqbel aseggas n 50. Tabṛatt i "Yiɛebṛaniyen" nettat a d-ṣbeḥ tura ger useggas n 60 d useggas n 70.

A nwali s umata, ger tedyanin i ɣef d-ḥekkun yemyura-agi meṛṛa, d lawan i deg d-uran akk aḍrisen-nsen, mačči d akud ɣezzifen aṭas. A d-yernu ɣef wayagi, tugget n inagan iḥeḍren, iwalan s wallen-nsen ayen akk ɣef d-ttmeslayent tira-agi. D azal n taggwa yebnan ɣef umezruy.


Commentaires (0)



Pour ajouter un commentaire il faut être membre du site