I wacu rebɛa n Linǧilat?D asteqsi i d-yettuɣalen di yal tikelt i deg ara nemmeslay ɣef ayen yeɛnan Linǧil d uselmed n Lmasiḥ. Imi nuɣ tanumi nettawi-d ɣef "Awal n Ṛebbi", aṭas ɣur-sen ad yili kan d yiwen n uselmed ara yilin deg yiwen wedlis kan.

Imeddukal yeɛna usteqsi-agi, uɣen tanumi s tikta-agi. Ɣur-sen, Lmasiḥ yeǧǧa-d aselmed, yeǧǧa-d "Adlis" yettusemman "Linǧil", ad yili kan d yiwen. Di lefhama-nsen daɣen, qqaren belli, ma d tidett Linǧil, ilaq ad yili kan d win yura Lmasiḥ s yiman-is, d win i d-yersen fell-as netta kan. Ɣur-sen mada gella nettmeslay-d ɣef rebɛa n wadlisen n Linǧil, ahat ad yili yella kra ibeddlen deg-s, yella wayen sxeṣren-deg-s inelmaden-agi n Lmasiḥ i d-yuran fell-as.

Adlisen n Linǧil d isallen!

Ilaq-aɣ a d-nessefhem amek d teqqim tnagit n Lmasiḥ ger inelmaden-is. D wamek d-yusa Linǧil ara yilin d izen n Lmasiḥ i d-ṣṣawḍen inelmaden d inagan imezwura. Tasarut ad tili deg amek d yura Linǧil. Axaṭeṛ, mačči d Lmasiḥ s timmad-is i t-id-yuran, yerna mačči dayen i d-yuran deg yiwen n " Wedlis" kan. Taggwa n Lmasiḥ a s-nsel ɣer inelmaden-is yellan d inagan-is, tenti daɣen ṣṣawḍen-d ayen akk slan d wayen walan, ǧǧan-t-id i wiyyiḍ, i leǧyal i d-iteddun.

Rebɛa n yemdanen yuran Adlisen n Linǧil, ttwasnen ger inagan imezwura n Lmasiḥ. Ayen d-uran yella yakan d ayen iteddun ger-asen. Ttawin-d sɣur inagan imezwura iɛacen tidyanin meṛṛa yeɛnan Lmasiḥ, aselmed-ines, taɣlift-ines.

Yella Marqus di lemtel, netta d ameddakel n Butrus. Amezruy n Butrus yettwasen mliḥ. D anelmad ger wid yellan ɣer tama n Lmasiḥ, d win iɛacen yid-s, iwalan s wallen-is ayen yexdem. Yeṣṣaweḍ-d imeslayen-is d uselmed-ines. Yeqqar-it-id s yiman-is. " Mačči d timɛayin i wen-d-nḥekku, lameɛna nwali s wallen-nneɣ tamanegt n Lmasiḥ ". Marqus yesnejmaɛ-d amezruy d tedyanin n Lmasiḥ, aselmed-ines d wesfel-ines ɣef umidag. Ayen d-yura yebna ɣef tnagit iṣeḥhan i d-yewwi sɣur inagan n tidett.

Deg adlisen-agi d izen n leslak!

D ayen daɣen ara n-nini ɣef yemyura nniḍen. Ama d Maṭṭa, ama d Luqa neɣ d Yuḥenna. Di rebɛa yid-sen, yal yiwen d ttama i d yeṭṭef iwakken ad yeḥku ɣef Lmasiḥ d uselmed-ines d wamek yella d asfel i leslak n yemdanen. Ṣsawḍen-d izen n Lmasiḥ. Wigi uran-d deg adlisen-nsen ɣef lexbaṛ n Lxir n Lmasiḥ yeɛnan leslak n yemdanen.

Yuḥenna s yiman-is, ula d netta ger inelmaden imezwura iɛacen d Lmasiḥ. S tezmert n Ṛṛuḥ ara d-yejmeɛ aselmed n Lmasiḥ. Ad ibeggen belli ayen akk d-yura, yura-t-id iwakken imdanen ad amnen belli d Lmasiḥ i d "Abrid i d ttidett", yerna s kra n win yumnen yis ad yesɛu tudert n dayem, ad itusellek ( Yuḥ 3:16). Deg aḍris i d-iteddun ad nernu awal ɣef yemyura nniḍen. Luqa d Maṭṭa.

Nenna-d d akken d asteqsi i d-yettuɣalen ɣef ayen yeɛnan Linǧil, adlis ɣef ssarsen imasiḥiyen taflest-nsen. Rebɛa si ger inagan imezwura qesden a d-arun ɣef Lmasiḥ zman-is d wayen akk yesselmed aked wesfel-ines ɣef umidag, ḥeggu-ines si ger lmegtin.

Deg uḍris-nneɣ amezwaru, asteqsi amezwaru, nemmeslay-d ɣef Marqus d Yuḥenna yellan seg imyura-agi. Nenna-d belli Marqus yella d aqrib n Butrus, iteddu yid-s, yettaru ayen akk iwumi yesla ɣur-s, yettaru daɣen ayen yesla ɣer inagan nniḍen d wayen d-ǧǧan, d aselmed n Lmasiḥ d taɣlift-is d wesfel-ines. Nemmeslay-d daɣen ɣef Yuḥenna, netta ger inelmaden imezwura, yesnen Lmasiḥ, iɛacen yid-s, am Butrus, iwala leɛǧayeb yexdem d tezmert n Ṛebbi i d-ibanen di Lmasiḥ. Yura-d ayen akk yeɛnan Lmasiḥ yellan d amsellek.

Linǧil d tanagit!

A nwali ihi, amek Linǧil, lexbaṛ n lxir yeɛnan Lmasiḥ, ǧǧan-aɣ-t-id inagan yebnan ɣef tidett ayen akk d-ṣṣawḍen di tira-nsen. Di rebɛa yid-sen, a d-ḥkun ɣef yiwen n yizen. Yal yiwen d tama i d-yeṭṭef, d wamek d-yesnejmaɛ tidyanin d imeslayen n Lmasiḥ iwakken ad yeẓḍ aḍris-ines. Deg ul n yal aḍris a naf tudert d teɣlift n Lmasiḥ. Asfel-ines ɣef umidag i leɛfu n ibekkaḍen n yemdanen. Ḥeggu n Lmasiḥ ara yilin d ttbut d tudert-is, d trennawt-is ɣef tezmert nddnub d lmut. D wagi i d Linǧil. D Lexbaṛ yessefraḥen. D Leslak.

Adlis i d-yura Maṭṭa (neɣ Lewwi)

Amyaru nniḍen n Linǧil, yettusemma Maṭṭa. Qqaren-as daɣen, Lewwi. Ula d netta d anelmad ger imezwura. D anagi ula d netta ɣer lɛinṣer, akken neqqaṛ. Netta ad yaru aṭas ɣef laṣel n Lmasiḥ ara d-ilalen seg at Israil, ara yilin di later n lenbiyya meṛṛa n wat Israil, skud d netta ara yesnekmalen lemɛahda n Ṛebbi i d-yeǧǧa si tazwara i wat Israil.

Tiɣri n Linǧil n Maṭta ad truḥ daɣen ɣer ddunit meṛṛa iwakken inelmaden ad ṣṣiwden aselmed n Lmasiḥ d leslak yella deg isem-is i leǧnas meṛṛa (Maṭṭa 28: 18-20). Tikat ara yecrek Maṭṭa d wid meṛṛa ara yeɣren adlis-ines, d tagelda n Ṛebbi i d-iqerben ɣer yemdanen. Lmasiḥ d agellid ara yesnekmalen leslak, d asbeddi n tgelda.

Deg adlis n Maṭṭa ɣef Lmasiḥ, a naf aṭas n lberhanat d tezmert ara d ibeggen ger yemdanen. Aselmed n Lmasiḥ ɣef ayen yeɛnan leslak d tgelda n Ṛebbi. Aṭas n lemtul ara d yefka Lmasiḥ iwakken ad yessefhem lesrar n tgelda n igenwan. Seg at Israil alamma d leǧnas meṛṛa, ayen akk i d-yewɛed Ṛebbi, s lenbiyya imezwura, a t-yesnekmal di Lmasiḥ.

D netta i d agellid-nni tettraǧu ddunit. S lmut-is ɣef umidag d ḥeggu-ines si ger lmegtin, yerbeḥ-d leslak i wid meṛṛa ara yamnen-is, di ddunit meṛṛa.

Nettawi-d deg aḍrisen n isteqsiyen-agi, ɣef tira n rebɛa wadlisen i d-yemmeslayen ɣef Lmasiḥ d uselmed-ines d teɣlift-ines. Amek alarmi rebɛa n wudmawen n tira ara d-icehden ɣef Lmasiḥ d leslak yellan deg isem-is.

Adlis d-yura Luqa

Tikelt-agi a d-neqqim ɣer wadlis n Luqa. D yiwen si ger linǧilat yuran i leǧnas. Deg-s izen n Lmasiḥ i talsa meṛṛa. Yura s wudem d amatu. D izen n leslak di Lmasiḥ yellan d “Mmis n Adem”. Netta daɣen yeqqar ɣef yiman-is, d “Mmis n bunadem”. Yeẓḍa tagmatt ger-as d yemdanen meṛṛa n ddunit.

Nezmer a d-nini d asaru n talsa i deg d-yura wadlis-agi n Luqa. Lmasiḥ yusa-d ad isellek talsa meṛṛa si tedyant n tuccḍa d wezgal.

Tikta-agi i s yura wadlise-agi n Luqa, a ɣ-d-smekti mliḥ daɣen aselmed n Bulus makken d-yeqqar deg yiwet si tebṛatin-is, d akken Lmasiḥ d « udem n Adem ». Di lǧerra n Adem i d-yusa ɣer yemdanen yellan d tarwa n Adem. Akken yeqqar Bulus deg awal-is, Lmasiḥ d “Adem wis sin”. Iwakken ad iɛebbi izgalen n tarwa n Adem, yusa-d ɣer ddunit, yewwi-d iseɣ d leslak i talsa.

Luqa d ameddakel n Bulus

Ma nenna-d ayagi, ur ntettu ara belli Luqa d ameddakel n Bulus. Iteddu yid-s deg aṭas n yinigen-ines, yella isel aṭas i uselmed-ines. Ahat ayagi a ɣ-yawi iwakken a nefhem tiktiwin ara yessexdem Luqa i tira n wadlis-ines. Luqa yella d ṭbib, yeɣra ama d taɛibranit ama d tagrigit. D netta daɣen ara yarun adlis-nni n umezruy d yettawin ɣef lecɣal n yemceggɛen. S wadlis-agi nniḍen ara nefhem tamusni yesɛa d isallen meṛṛa i d-yesnejmaɛ iwakken a d-yaru ɣef Lmasiḥ, tudert-is d teɣlift-ines.

Akken t-id-yenna deg awal-is, yesteqsa wid meṛṛa yellan d inagan, i ḥeḍren, slan, walan ayen akk yeḍran ɣef Lmasiḥ. Aselmed-ines d wesfel-ines i leslak n yemdanen.

S linǧil-agi i d-yura Luqa, ara nefhem aṭas ṛṛeḥma n Yillu d-yersen ɣef yemdanen n ddunit meṛṛa. Adlis-agi n Luqa yerna-d ɣef wadlisen nniḍen i ɣef d-nemmeslay yakan, iwakken ad yessiɣ tafat nniḍen i s ara nefhem azal n Lmasiḥ d tidett icudden ɣur-s. Ɣer tagara, a d-nini, yeddukel yizen d uselmed n Lmasiḥ di rebɛa n wadlisen n Linǧil.


Commentaires (1)


(Unknown) - 2011-12-08 18:31

amek ayhus wab3ed saroh iqedsen



Pour ajouter un commentaire il faut être membre du site