Titeggarin timezwura yellan d tiqdimin yakan, d tibṛatin i yura Bulus s yiman-is. Tid meṛṛa yura uqbel ad yili d ameḥbus di Ṛuma, ger useggas n 60 d useggas n 62. Nufa belli azal n ɛecra n tebṛatin yura-tent ger usaggas n 48 d useggas n 60. D iḍrisen imezwura meṛṛa n Lɛehd Ajdid.
Anwat ihi Bulus-agi yellan seg imyura imezwura, i d-yeǧǧan iḍrisen n Lɛehd Ajdid ? Yella d aɣerman aṛumanin, lṣel-is seg at Israil. Isem-is asrayili d Caɛul. Ilul di temdint n Ṭarsus, d tamdint d yezgan asamar n tmurt n Ṭṭurk. D tamdint yettwasnen aṭas di lawan-nni, deg seggasen imezwura n talit-nneɣ. D tamdint i deg llan aṭas n imusnawen igrigiyen d leǧnas nniḍen; ttilint-d aṭas n tmliliyin degs n tsekla d usfelsef d ttmusni meṛṛa iteddun di lawan-nni.
Ayagi a t-id-yebder di tira-ines, a naf daɣen yura-d wayagi deg Adlis n Luqa ( Lecɣal 21 :39). Ad yemlil ihi d wayen i wumi neqqar « Idles agrigi » yellan d idles n tmusni ifazen, d idles yettwasnen s yismawen-nni meqqren n wid yesfelsifen. D idles ara naf yeǧǧa-d later di tiktiwin n Bulus, di tebṛatin-is akk d yiniyen yura.
Yeɣra di Yirucalim ɣer yiwen uselmad meqqren yettusemman Gamalyal. Aselmad-agi d yiwen seg meqranen n ukabar n ifariziyen, akabar n ddin n wat Israil. Yella Bulus d anelmad d yewwin iman-is, yeččur d leḥrara, yeṭṭef mliḥ deg ansayen n lejdud-is, d tnettit n wat Israil. Ad yini ayagi di tebṛatt yura i wat Galasya (1.13).
Yezmer ahat ad yili yettekka ula deg seqqamu ɛlayen n wat Israil. Deg akken yeṭṭef nezzeh deg iṣuḍaf d wansayen n wat Israil, yekker-d mgal imasiḥiyen imezwura n Yirucalim, ladɣa imeddukal n Stifanuṣ. Yella ahat isell i uselmed n Stifanus di tejmaɛt n wat israil dinna di temdint n Tarsus. Yuɣ lḥal, ifhem d akken aselmed n imasiḥiyen-nni ixulef meṛṛa ayen yellan d leɛbada n wat israil d wansayen-nsen.
Degmi ara yeqbel ad ḥekmen s lmut n Stifanus, yerna ad inadi ad iqehher meṛṛa wid yumnen s Lmasiḥ. Axaṭeṛ ɣur-s, abrid-agi i ɣer ssawalen, yekka-d mgal uselmed d lefhama n ddin i deg ṭṭfen wat Israil. Yili d ayen ɛzien fell-as netta.
Yenna-t-id deg awal-is, yella uettqehhir imasiḥiyen, yettnadi ad yessenger tijmuyaɛ-nsen ( Galasya 1.13). Armi d ass i deg yemlal d Lmasiḥ, deg ubrid n Dimecq, anda yeɛqel, s lbal-is d terwiḥt-is, tidett n leslak yellan deg ubrid-agi. Ters-d deg ul-is s ttbut meqqren tidett n lmut d ḥeggu n Lmasiḥ. Yuqel d netta i yrefden izen-agi n Lmasiḥ, yuqel si ger imceggɛen ara yeṣṣiwḍen lexbaṛ n Lmasiḥ i leǧnas meṛṛa.
D tudert-is yenbeddalen ara yilin d tangit d ttbut n wayen ara yesselmed ara yeṣiṣiweḍ, di tebṛatin akk ara yaru ɣer zdat. D iḍrisen ara d-yeqqimen i wmezruy.
