Lettre de PaulDeg uḍris iɛeddan, anda i d-newwi ɣef tnagit n Bulus, nessaken-d udem d umezruy n wergaz-agi, i yellan d amyaru meqqren, d iminig ger leǧnas, yeǧǧa-d aṭas n tiktiwin d uselmed n teflest tamasiḥit, yerna s tira-ines daɣen i yettunefk lsas n « Tira » n Lɛehd Ajdid. Degmi, deg uṭun-agi wis 5 ɣef titeggarin n Lɛhed Ajdid, a d-nawi ɣef Tira i d-yeǧǧa umceggeɛ Bulus. D ttbut iṣeḥḥan i s ibeddent « Tira » n Lɛehd Ajdid.

Di tebṛatin n Bulus ara naf aṭas n uselmed yeɛnan liman amisiḥi. Deg-sent tikta d wazalen i llan ṣṣawaḍen-ten yemceggɛen imezwura. Neẓra belli d tibṛatin n Bulus, ladɣa timezwura-ines meṛṛa, igellan teddunt ger tejmuyaɛ n lawan-nni; uqbel ahat idlisen akk nniḍen i nessen ass-agi ara naf di Lɛehd Ajdid. A d-nini d later amezwaru n tmasiḥit. D aselmed icudden aṭas ɣer timmad n Lmasiḥ. Irennu-d daɣen deg uselmed-agi n tebṛatin n Bulus, tudert n tmesgidiwin d tikli-nsent.

Yeqqar-d Bulus amek yessen imceggɛen nniḍen, yellan d imezwura fell-as. Netta yerna-d kan ɣer zdat. Ur ibeddel kra deg uselmed-nsen, lameɛna irennu di tissas n wayen akk ɣef d-ttmeslayen netni yakan. Yuder-d di lemtel, Butrus d Yuḥenna. Yenna-d fell-asen, d netni i d tigejda n tejmuyaɛ n Yirucalim.

Di tebṛatin-is daɣen a neɛqel tamusni yesɛa ɣef ayen akk yeɛnan Lmasiḥ, tudert-is d uselmed i d-yeǧǧa. Di tebratin-is meṛṛa yella umezruy d tikli tamasiḥit. Amek teddunt tejmuyaɛ di lawan-nni, amek i ttqabalent imadanen sent-d-yezzin, d lḥukama n ṛṛuman yellan tikwal tettqehhir “ wid akk yeṭṭabaɛen abrid n Lmasiḥ”.

S yinigen-ines daɣen, Bulus d anagi ger leǧnas d tmura meṛṛa i d-yezzin i “Yigerakal” yellan ddaw leḥkem n umenkud n Ṛṛum; d later n umezruy ara yefken i Tira n Lɛehd Ajdid azal-nsent deg umezruy. Nezmer a d-nini ihi, Bulus, ama s yiman-is ama s yeḍrisen-is, d ttbut meqqren ara iṛeṣṣin tidett i titeggarin n Lɛehd Ajdid.

Amezruy meṛṛa n Linǧil a t-naf di tebṛatin n Bulus. Ayen i d-uran yemyura n yedlisen nniḍen n Tira n Lɛehd Ajdi, a t-naf yessefhem-it-id Bulus si tikta-ines netta, yerna yesseɣzef deg selmed-nsen i wakken a t-id yessefhem am akter i leǧyal nniḍen.
Yeqqar-it-id deg awal-is, di tebṛatt yura i wat Kurintus ( 1 Kur 15 :11): « Linǧil i sselmadeɣ d win i sselmaden yakan yemceggɛen imezwura...».

Yerna neẓra belli, di zzman-is ur yessin ara lmasiḥ di teɣlift-is, makken iɛaac ger yemdanen, yerna daɣen ur yessin ara si tazwara inelmaden d yemceggɛen imezwura. D acu kan yettunefk-as-d sɣur Yillu, yizen n Lmasiḥ, yessawel-as-d ad yili d amceggeɛ ɣer leǧnas, ger-asen ad yesbed tanagit n Lmasiḥ. Lmut-is d ḥeggu-ines ara yilin d azal i leslak n yemdanen meṛṛa.

S tebṛatin-is, d izen ara yeṣṣiweḍ Bulus ɣer leǧnas d iduba n ddunit meṛṛa. akka daɣen i d-yeqqin Bulus d anagi d amyaru n Lɛehd Ajdid. Titaggarin n Lɛeh Ajdid, yennerna ccan-nsent, iṣeḥḥa wazal-nsent, s tidett n Lmasiḥ, s tnagit n Bulus.


Commentaires (0)



Pour ajouter un commentaire il faut être membre du site