I wacu lmut n lmasiḥ?D asteqsi i d-yettuɣalen deg ayen yeɛnan tikta n wesfel s umata. Linǧil yebna ɣef uṣiweḍ n wesfel-agi yellan d talemmast n ccɣel n leslak. A d-nini, mebla lmut n Lmasiḥ ɣef umidag ur yettili ara ttawil i s ara qerben yemdanen ɣer liman di Ṛebbi iwakken ad afen ɣur-s asirem d leslak.

Lmut n Lmasiḥ d asfel i leɛfu n ddnubat n yemdanen. Idammen-is yuzzlen ɣef umidag ad ṣfun meṛṛa azgalen d ttucḍiwin n yal amdan. Akka i yella lḥal di Tira iqedsen. Asfel n Lmasiḥ yusa-d di later d ttrika n iseflawen-nni meṛṛa yellan di Tira, di Lɛehd Aqdim. Iseflawen-nni ɣef d-ttmeslayen Tawṛat n Musa d iṣuḍaf d yeǧǧa Yillu i wat Israil. Aẓeṭṭa n Tira d win ara d-yeṣṣiwḍen alama d amidag n Lmasiḥ.

Yiwen wesfel!

Di lɛehd Ajdid, di tebṛatt yuran i Yiɛebṛaniyen a naf aṭas n usefhem n tikta-yagi yeɛnan tidett n iseflawen, d wamek nnekmalen meṛṛa deg yiwen n wesfel. Winna n Lmasiḥ. I yiwet n tikelt. Idammen n Lmasiḥ ttwaqeblen zdat n Ṛebbi. S idammen-is ara yeṣfu wid akkit ara d-iqerben ɣur-s s lettkal. Ibekkaḍen-nsen ttwaɛfan, ulawen-nsen uraden, tiṛwiḥin-nsen ḥlant si ddnub d cceṛ. Yelha ma neṭṭef lweqt a nɣer tabṛatt-agi “Iɛebṛaniyen“. Deg-s azal n wesfel n Lmasiḥ yellan d lsas d lekmal i leslak n wemdan.

Asfel n Lmasiḥ mačči d ddin. Mačči d ayen i d-snulfan yemdanen s ixemmimen-nsen d lecɣal-nsen. Lmasiḥ d izimer-nni d yekkan sɣur Yillu, seg igenwan. Xas mada gella d imdanen, at Israil d wat Ṛuma, i yedduklen msefhamen ɣef lmut-is, wagi d ttawil ɣef yeɛmed Ṛebbi a d-yeḍru. D lebɣi-ines, iwakken ad yili Lmasiḥ d asfel ɣef ddunit meṛṛa. Ayagi ihegga-t-id si tazwara. Icar-d fell-as s yemceggɛen-is ger yemdanen di yal tasuta di yal zzman. Yesnekmal-it deg udrar n Gulguta ass-nni i deg semren Lmasiḥ ɣef umidag.

Izimer n Ṛebbi!

Tira qqarent-d belli ulac ssmaḥ n ddnub mebla tazla n idammen. S wesfel n idammen ara ttwaɛfun yezgalen n yemdanen. Ulac daɣen asfel yeṣfan yennekmalen i yzemren ad yekk nnig n ibekkaḍen akk d ddunit seg mi d-tella deg mezruy-is meṛṛa. Iseflawen-nni ttqeddimen yemdanen di lɛaddat-nsen d ddeyyanat-nsen, ur ṣṣawaḍen ara ɣer leslak d leɛfu.

Axaṭeṛ imdanen meṛṛa ɣlin di ddnub, ar aẓar. Ilaq wesfel ara yilin seg aẓar, s tidett, ara d -yekksen aẓar n ubekkaḍ d ddnub seg ulawen n yemdanen. Asfel-agi d win yeṣfan d win ur nxuṣṣ ara di tezdeg-ines d lekmal-ines; ilaq ihi ad yili d win d yekkan srid sɣur Ṛebbi. D Yeḥya i d-igren tiɣri makken iwala Lmasiḥ i teddu-d: " Wagi d izimer n Ṛebbi ara yekksen ddnub n yemdanen... " Linǧil n Yuḥenna 1:29.


Commentaires (0)



Pour ajouter un commentaire il faut être membre du site