Amek qublen inelmaden Lmut n Lmasiḥ?Aṭas n yemdanen i gzemren ad mmten d imeɣrasen ɣef tikta-nsen d tmurt-nsen. A d-nini d ayen i deg ṭṭfen, d timentilin-nsen. Mektit-d, ama d imeɣrasen n kra n tegrawliwin di ddunit, ulamwa d imeɣrasen n tmezgida seg mi d-tebda deg umezruy.

Aɣbel i d-mmugren inelmaden n Lmasiḥ, d tamentilt nni nsen yemmuten ɣef umidag. Llan umnen belli Lmasiḥ, ur d-yewwi ara leɛqel-nsen ad immet. Umnen daɣen belli d netta ara yesbedden tagelda n Ṛebbi, ad yili d agellid n wegdud n wat Isṛail. Iwakken a nefhem assaɣ yellan ger Lmasiḥ d inelmaden, amek alarmi i d-yekka wesfel n umidag nnig lefhama-nsen, d tin n yemdanen s umata, ilaq-aɣ a nessiked deg umezruy, ladɣa di tmeṭṭi n wat Isṛail, di lawan-nni i deg d-iban Lmasiḥ, iwakken a nwali amek ttxemmimen yemdanen ɣef umsellek, d ccɣel-ines.

Lmut n Lmasiḥ d awezɣi?

Tudert d uselmed n Lmasiḥ d ayen i yxulfen aṭas tiẓri n at Isṛail deg ayen ayen yeɛnan Lmasiḥ. Akken tettraǧun di lweqt nni. Si temẓi-nsen, At Isṛail, ttuṛebban-d s yiwet n tmuɣli d taɣelnawt d tagrawliwt, d tikta ɣef Lmasiḥ yellan d timeslellit. Ɣilen ad yili d yiwen umalway asertay ara yidiren di trennawt s tgeldit-is, a d-issukes Iyahudiyen seg uzaglu n umenkud n Ṛṛuman. Ma d Lmasiḥ ara yenneɛtaben, ara yettumerten ɣef umidag, d ayen ur tqebbel ara leɛqliya-nsen.

Ɣer waṭas n yemdanen, udem n Lmasiḥ iqqim-d d winna kan i ɣef d-ibecceṛ nnbi Icaɛya aked lenbeyya nniḍen, di zzman nni. Yura-d, d mmi-s n Dawed ara d-yawin tarennawt d tlelli i wegdud n at Isṛail. Ad isbedd tagelda n talwit aked lḥeqq. D acu kan yuran fell-as, ad yenneɛtab, ad yettunefk d asfel. Ayen akk d-inna Lmasiḥ ɣef wayen yeɛnan lmut-is ɣef umidag, ur t-qbilen ara inelmaden-is. (Luqa 9: 22).

Tasarutt d ḥeggu n Lmasiḥ!

Iwɛer-asen i yinelmaden imezwura ad fehmen azal n wesfel n Lmasiḥ ɣef umidag. A nwali kan Buṭrus makken i t-yenker. Axaṭer ur yefhim ara, mazal i s-d-ittuweḥḥa wazal n umidag. Armi i d-yeḥya Lmasiḥ ass wis tlata, i d-iban i yinelmaden meṛṛa wazal n umidag. Neẓra belli Tira meṛṛa, lenbeyya meṛṛa mmeslayen-d ɣef wesfel n Lmasiḥ ɣef umidag ara yilin d sebba n leslak n yemdanen. D acu kan yeqqim d sser.

A d nini s liman d uweḥḥi n Tira ara nefhem azal-agi n wesfel n Lmasiḥ. A namen belli nuḥwaǧ ɣer leɛfu d ssmaḥ sɣur Yillu. Akka ara yili di tudert-nneɣ wazal n wesfel n Lmasiḥ. D ayagi i fehmen inelmaden makken i sen-d-iban Lmasiḥ yedder. Anagar ḥeggu n Lmasiḥ aked temlilit yid-s, i yessawḍen inelmaden ad amnen d akken d netta i d Lmasiḥ. Mačči kan s yimawen-nsen aked tudert-nsen i d-qerran swayagi, d acu kan, cehden-d fell-as ula s lmut-nsen. D abrid d tidet d tudert.


Commentaires (0)



Pour ajouter un commentaire il faut être membre du site