Lmasiḥ yusa-d ɣer ddunit i leslak n yemdanen. Yettwaḥbes yerna ḥekmen fell-as s lmut imeqranen n ddin n wat Israil di lawan-nni. Cehden fell-as s rregmat di ddin-nsen. Imi, di lbal-nsen, yeḥseb iman-is d Ṛebbi. Deg ṣuḍaf-nsen d ayen yettawin ɣer lmut. Degmi yettwasemmeṛ ɣef umidag s ufus n ṛṛuman yellan ḥekmen tamurt.
Tameddit-nni, d ass n usteɛfu i yebdan, taggara n ddurt. Inelmaden-is ur bɣin ara ad ǧǧen akken tafekka-ines tettwaɛelleq ɣef umidag. Dɣa ttlen-t di lekfen, ssersen-t deg yiwen uẓekka yellan daxel n weẓru. Ṛṛuman ɣelqen tawwurt n wezru-nni s yiwen n weblaḍ meqqren. Yerna sbedden taɛessast dinna.
Si lmut ɣer ḥeggu !
Lmut n lmasiḥ tessers-d rrehba ɣef inelmaden. Yeffeɣ-iten leɛqel. Yeqḍaɛ usirem-nsen. Akken i s-nnan inelmaden-nni yellan teddun deg ubrid-nsen si Yirucalim ɣer taddart n Imayus : « nessaram d netta ara iselken Israil si teɛsirt... » Luqa 24 : 21. Asirem-nsen yensa. D acu kan, mi yɛedda wass n usteɛfu, ruḥent tlawin iwakken a s-xedment rriha i tfekka n Lmasiḥ, ufant aẓekka-ines d ilem. Ɣer zdat, Lmasiḥ ibeggen-d iman-is i ynelmaden. Issekken-asen-d ifassen-is d iḍarren-is akken s ccwami-nni n imesmaren. Ziɣ yeḥya-d si ger lmeggtin. D ayen yuran di Tira yakan.
Yerna daɣen iban-d i ynelmaden azal n 40 wussan, mbeɛd lmut-is. Yeqqim, itett yettmeslay yid-sen. Mačči kan d yiwen neɣ d kra i t-iwalan akken yedder. D tugget n yemdanen i t-iwaln, cehden-d fell-as yedder. Yuɣal-d si lmut. Netta i d-yusan seg igenni, yemmut ɣef umidag, ass wis tlata yeḥya-d. Yerna daɣen, zdat n yemdanen, si ger-asen, i yuli ɣer igenni. Tɣumm-it tagut zdat-sen, makken yuli.
Ḥeggu n Lmasiḥ d ttbut i leslak !
Tira Iqedsen, qqarent-d d akken Lmasiḥ yedder, yettwali-d ddunit meṛṛa, isell-d i kullec. Yettili deg ulawen n wid meṛṛa yumnen yi-s itteklen fell-as, d amsellek-nsen. Yettɛassa fell-asen meṛṛa, isedday-iten s Ṛṛuḥ-is.
D tidett-agi n ḥeggu n Lmasiḥ i yessersen ttbut n liman amasiḥi. s ḥeggu n Lmasiḥ i s bedden inelmaden, ččuren d tissas iwakken ad ṣṣiwḍen lexbaṛ n leslak i ddunit. Di tebṛatt tamezwarut i wat Kurintus, deg ixf 15, Bulus a d-yesmekti amek s ḥeggu n Lmasiḥ ara nesbedd liman-nneɣ, ara nqabel tudert n yal ass. D ttbut yellan deg umezruy. Imi aṭas n inagan i yellan ama ɣef lmut ama ɣef ḥeggu n Lmasiḥ. D ḥeggu n Lmasiḥ i yessrsen ṭṭabeɛ n tudert d leslak - 1 Kurintus 15.
Mi d-yeḥya, ikemmel yettweṣṣi inelmaden-is, yeǧǧa-yasend tabṛatt i s ara ṣṣiwḍen aselmed-ines d lexbaṛ n lxir i leslak n wid akkit ara yamnen yis. D lewṣaya i sen d-yeǧǧa : « Ṛuḥet ɣer tmura meṛṛa n ddunit, slemdet imdanen iwakken ad uɣalen d inelmaden-iw, ad ttwaɣeḍsen s yisem n Baba Ṛebbi, s yisem n Mmi-s aked yisem n Ṛṛuḥ iqedsen. Slemdet-asen ad xedmen ayen akk i wen-slemdeɣ, ma d nekk ad iliɣ yid-wen yal ass, alamma d tagara n ddunit. » (Matta 28:19-20).
