Yenna-d lmasiḥ deg awal-is : “D nekk i d abrid, tidett aked tudert. Ulac win izemren ad yas ɣer Baba Ṛebbi mebla yis-i.” (Linǧil n Yuḥenna 14:6).
Yewwi-d lḥal a nmeyyez amek alarmi i d-yenna ayagi.
Di lbal n waṭas n yemdanen, yewɛer ad yettwiqbel yini am agi. Axaṭeṛ uɣen tanumi yemdanen ttamnen belli, yal wa d abrid-is ara yeḍfer iwakken ad yemmager, ma yella wamek, tidett icudden ɣer Ṛebbi.
Ɣer yemdanen aṭas n iberdan!
Aṭas n deyyanat i d-yellan di ddunit. Aṭas n tikta daɣen. Ama d asfelsef ama d tasertit neɣ d kra n tmusni icudden ɣer temsal n ṛṛuḥ, n lmut d tudert akkin i lmut.
Yal wa d abrid yeḍfer. Ama si lejdud ama s uqenneɛ kan s leqraya n yedlisen d usfelsef.
D acu kan, ger imusnawen akk n ddin yettwasnen, a nruḥ alamma d lenbeyya meṛṛa, ulac win d-yennan akka am Lmasiḥ. S Ttbut d tissas, belli d netta kan i d abrid.
Yerna, ur yeɛriḍ ara Lmasiḥ ad iḥettem ayagi. S tudert-is d uselmed-ines, s lemtel yella ger yemdanen, i d-yessers imeslayen-agi. Tidett d wannuz ddukulen deg uselmed n Lmasiḥ. Degmi i yezmer ad yini ayagi mebla akukru. Imi yezra d acu yella s tidett.
Yiwen n Yillu, yiwen n webrid!
Yiwen n Yillu i yellan. Ibeggen-it-id Lmasiḥ s wawal-is d tudert-is. Yiwen n webrid kan i yellan, yettawin ɣur-s. D Lmasiḥ s timmad-is. D netta i d-iweḥḥan s tidett awal d lebɣi n Yillu i yemdanen. Yekka-d sɣur-s, yesnekmal leslak s lmuit-is ɣef umidag d ḥeggu-ines si ger lmeggtin. Ma yenna-d belli d netta i d abrid, yenna-t-id i lmend n tnettit-ines d tezmert yellan deg-s. D tazmert n Ṛṛuḥ i yellan deg-s tessebgan-d yis lebɣi n Ṛebbi i yemdanen, i ddunit meṛṛa.
Ur yezmir ara ad yeskiddeb mi d-yenna ayagi. Axaṭeṛ iruḥ armi d lmut ɣef umidag. Yeẓṛa ɣef acu i d-yusa ɣer ddunit. Yeẓṛa ɣer wanida i yteddu. Yeẓṛa d acu yella s tidett. D Mmis n Ṛebbi. D win akken ara yessemṣalaḥen imdanen aked Yillu s idammen-is yuzlen ɣef umidag i leɛfu n ddnubat-nsen. Degmi i d-yenna : “ Nekk d abrid, d tidett, d tudert...”.
D ḥeggu-ines si ger lmegtin, ara yefken i ymeslayen-agi ines, tazmert-nsen d lsas-nsen i liman. Mi walan inelmaden-is d yemdanen n lwan-nni belli yeḥya-d si ger lmegtin, wwin-d s lexbaṛ belli mačči kan am lenbeyya nniḍen i yella. Wwin-d s lexbaṛ belli, tella deg-s tezmert i d-yekkan nnig n kra yellan di ddunit. Ḥala Ṛebbi i yzemren ad yeɣleb lmut. Ad yeɣleb tazmert n ddnub. Ad icerreg azeṭṭa n lmut iḥekmen ɣef yemdanen meṛṛa.
Ɣer tagar ad-nini, Lmasiḥ s lmut-is d ḥeggu-ines si ger lmegtin, yesnemkal leslak n yemdanen. Yesnekmal lebɣi n Ṛebbi deg mezruy n talsa d txelqit meṛṛa. Yemla-d i yemdanen iwakken ad issinen Ṛebbi, ad ttuselken. Degmi i d-yenna d netta i d “Abrid”. Ma nger tamawt ɣer wedlis n Yuḥenna a nefhem tissas yellan deg meslayen-agi n Lmasiḥ.
