Adlis n Tira Iqedsen, umi qqaren s tefṛensist «La Bible», aẓar-is si tegrigit “Biblos” lmeɛna-ines “Adlisen”. Deg adlis n Tira Iqedsen nnejmaɛn-d 66 n yedlisen yedduklen di sin yeḥricen. Lɛehd Aqdim d lɛehd Ajdid. Deg-sen yiwen n yizen. D «Awal n Yillu » i yemdanen. D tamsisit yesbed ger-as d talsa. Iswi-ines di Lmasiḥ.
Lɛehd Aqdim, agbur-ines
Aḥric amezwaru i d-nuder, d Lɛehd Aqdim. Degs 39 n yedlisen. D amezruy n usnulfu, n txelqit, d win n talsa ɣer iẓuṛan. A naf deg mezruy-agi, taggwa n wegdud n wat Israil. Yid-s ara yesbed tamsisit Yillu s yemcegɛen ara d-iweṣṣi ɣef iṣuḍaf-ines d lumurat-ines i yemdanen. Degmi ara nwali aḥric-agi n Tira d win yuran s tutlayt “taɛibṛanit”. Kra n yeḍrisen a ten-naf uran ula s tutlayt “taramayit”, ladɣa adlis n nnbi Danyil. Tutlayt-agi ttameslayen-tt wat Israil d yegduden izedɣen tamiwin-nni n usamar. Lmasiḥ s yiman-is yella yettmeslay taramayit.
Di Lɛehd Aqdim aṭas n tferfanin. Tamezwarut deg-sent d xemsa yedlisen. Laṣel n ddunit, Tuffɣa, At Lewwi, Anezṛuf d Usmekti. Degsen, iḍrisen n usnulfu, n txelqit, d iẓuṛan n talsa. Amezruy n wegdud n wat Israil. Taferfant nniḍen teɛna tnac n wadlisen yettusemman “Adlisen n umezruy”. Deg-sen amezruy d tgeldit n wat Israil. Taferfant tayeḍ, d xemsa n yedlisen, “Adlisen n tmedyazt”. Ger-asen ara naf Adlis n “Ihellilen”. A d-qqimen sbeɛṭac n Yedlisen umi neqqaṛ “Adlisen n lenbeyya”. Imi aṭas n lenbeyya n wat Israil ara d-yeǧǧen tira-nsen, d lewṣṣayat d licarat n wayen akk yewɛed Yillu i wegdud-is d leǧnas nniḍen. Heddren-d ɣef leslak-nni ara d-yasen.
Lɛehd Ajdid, leslak di Lmasiḥ !
Aḥric wissin n Tira Iqedsen, d Lɛehd Ajdid. Deg-s 27 n yedlisen. Uran akkit s tutlayt tagrigit. D tutlayt i teddun di lawan-nni deg d-iban Lmasiḥ. Yuɣ lḥal timura meṛṛa i d-yezzin i wagrakal llan ddaw umenkud n Ṛṛuman. Ma d tutlayt tagrigit tezga d tutlayt n tsekla n tira s umata. Nezmer a d-nini, Tira meṛṛa n Lɛehd Ajdid ɛnant Lmasiḥ s yiman-is. D amsellek n yemdanen. Yefka-man-is d asfel i leɛfu n ddnubat. Yis ara qeṛṛben yemadanen ɣer Yillu mi ara yamnen-yis. D tasarut i leslak-nsen. D wagi i d izen ɣef d-ttawin meṛṛa yedlisen n Lɛehd Ajdid.
Lɛehd Ajdid yebda-d s rebɛa wadlisen n Linǧil. D isallen yeɛnan Lmasiḥ. Tudert-is d teɣlift-is ger yemdanen. Lmut-is ɣef umidag, ḥuggu-ines sir ger lmeggtin d walluy-ines ger igenni. Lewṣṣayat i d-yeǧǧa i ynelmaden-is. Rebɛa inelmaden i d-yuran ɣef tudert n Lmasiḥ, yal wa d tama i d-yeṭṭef iwakken ad yessefhem amek i ɣ-yella Lmasiḥ d amsellek, d win akken ɣef d mmeslayent meṛṛa Tira Iqedsen. A d-yernu wedlis nniḍen “Lecɣal n yemcegɛen”, d amezruy n imasiḥiyen imezwura d asbeddi n mezgida d uṣiweḍ n lexbaṛ n lxir i ddunit meṛṛa. Taferfant nniḍen, d tibṛatin n Bulus n tid n inelmaden-nniḍen uqbel-is. Ssefhament-d aselmed d liman di lmasiḥ. Ɣer tagara, d adlis n “Uwehhi”. Yettawi-d ɣef tagara n ddunit d yizen n leslak di Lmasiḥ. D asirem, d tiɣri i yemdanen meṛṛa iwakken ad ṭṭfen di Ṛebbi.
