Amek ara nefhem tamezgida?Tamezgida yellan d tajmaɛt n wid meṛṛa yumnen s Lmasiḥ, tettusemma d tafekka n lmasiḥ. Netta yellan d amsellek, d aqerru ɣef tejmaɛt meṛṛa. D sser ameqṛan yellan di Tira iqedsen. Sser-agi yerna-d ɣef win n Lmasiḥ s yiman-is.

D acu-t sser n Lmasiḥ?

Linǧil n Yuḥenna ihedder-d ɣef Lmasiḥ yellan d "Awal" n Ṛebbi. D netta i d Ṛebbi. (Yuḥenna 1). Yusa-d i leslak n yemdanen. Tigzi n wemdan ad tamen s wayagi. Win akken yellan d "Awal" iban-d i talsa, iɛac yid-s, ibeggen-as-d abrid i leslak. Yettusemma d Mmi-s n Yillu s tezmert n Ṛṛuḥ iqedsen. Yedder i lebda. Ur yesɛi tazwara, ur yesɛi tagara. S lmut-is ɣef umidag yesnekmal leɛfu n ddnub, iḥeṛṛ-d leslak i wid akk ara yamnen yi-s. Yeḥya-d si lmut, ass wis tlata, iban-d i yinelmaden-is d wid akk yellan ḥeḍren di lawan-nni, yid-sen. Yuɣal yuli ger igenni. Yedder d agellid, yeḥkem ɣef kullec. Ɣer tagar a d-yuɣal s ccan d tmanegt. Yeǧǧa-d lewṣayat i yinelmaden-is. Yerna yessers-d Ṛṛuḥ-is fell-asen. S wakka i yebdan ttnejmaɛn iwakken a t-ɛebden a t-ḥemden.

Lmasiḥ aked tmezgida-ines! 

Ɣef sser n Lmasiḥ irrenu-d sser n tmezgida. Yuɣ lḥal akkennni i teddun deg azal-nsen. Dduklen "am iḍudan ufus". Akken yella di Tira iqedsen, Lmasiḥ d aqeṛṛu n tmazgida yellan d tafekka-ines. Azal nniḍen di Tira yeqqar-d daɣen, Lmasiḥ  d argaz n tmezgida, nettat yellan d tameṭṭut-is. S wakka yewwi-d a nefrez belli, azal n lmasiḥ yeddukel d win n tmezgida. D lsas i s-ara ɣ-d-beggnent Tira lefhama-nneɣ n tmezgida d tudert-is. Mi ara nɣer kra n tebṛatin yellan di Lɛehd Ajdid a nwali sser-agi yedduklen ger Lmasiḥ d tmezgida. Tibṛatin n Bulus ttmeslayent-d ɣef sser-agi. Linǧil n Yuḥenna yettmeslay-d daɣen ɣef Lmasiḥ yellan d ameksa ɣef tejlib-is. Tajlibt-agi yellan d tamezgida. (Yuḥenna 10). Tajlibt-agi, d wid meṛṛa iteddun ddaw leɛnaya-ines.

Tamezgida s umata

Lmeɛna-ines ɣer tazwara, d tajmeɛt, d agraw n wid akk yumnen s Lmasiḥ. D agraw n wid meṛṛa iqeblen leslak di Lmasiḥ. A d-nini wid meṛṛa "yezgan" neɣ "yezdin", "dduklen" d agraw s liman s Ṛṛuḥ i sen-d-yettunefken sɣur Lmasiḥ. Iwakken ad ilin d yiwen n wegdud di liman d leḥmala n Lmasiḥ. D tawacult n Lmasiḥ yesbed s wesfel-ines fell-as, s leḥmala i d-yesser fell-as. (Ṛuman 5). Yeẓḍa deg-s tagmatt, ad teddukel ad tegmu s Wawal d Ṛṛuḥ. D lmasiḥ s Ṛṛuḥ-is i yesbedden tamezgida, yezdukel ɣur-s wid akk i d-yefda si ddnub d lmut. Ad uqlen d agdud yeddren ara yɛebden Ṛebbi s Ṛṛuḥ s tidett. Lmasiḥ icar-d ayagi i tmeṭṭut-nni tasamarit di Linǧil n Yuḥenna. (Yuḥenna 4).


Commentaires (1)


rf_fares_77@yahoo.fr (Unknown) - 2012-04-08 09:22

azul falawan ayhbiban asa tamgra awn aziza asa tamghra naruh ikkdsan dé rouh



Pour ajouter un commentaire il faut être membre du site