Amek nettḥussu s leḥmala n Ṛebbi?Ad iwali wemdan acḥal i t-iḥemmel Ṛebbi s tidett, mara yidir yid-s, yesɛa tudert i teddunun yid-s. Yewwi-d ad yili wassaɣ ger-as aked Ṛebbi. Axaṭeṛ Ṛebbi d Illu yeddren. Ibeggen-d leḥmala-ines i yemdanen s leslak i d-yefka di Lmasiḥ. Yeqsed Ṛebbi si tazwara ad isellek wid meṛṛa ara yamnen s Lmasiḥ.

A nɣer ayagi di Linǧil n Yuḥenna, ixf wis tlata. « Axaṭeṛ Illu iḥemmel imdanen n ddunit meṛṛa armi i d-ifka Mmi-s awḥid iwakken kra n win yumnen yi-s ur yettmettat ara lameɛna ad yesɛu tudert n dayem. Ur d-iceggdeɛ ara Yillu Mmi-s ɣer ddunit iwakken ad iḥaseb imdanen meɛna iwakken a ten-isellek.” (Yuḥenna 3:16-17).

Assaɣ, tudert aked Ṛebbi

S lmasiḥ tura mara namen yis a nesɛu assaɣ aked Ṛebbi. Axaṭeṛ d netta i yefkan iman-is d asfel fell-aneɣ iwakken a nemnaɛ si lḥisab d lmut. Issazdeg ulawen-nneɣ, yekkes ddnub-nni i ɣ-isbeɛden ɣef Ṛebbi. Tura, s Lmasiḥ, kra n win yumnen ad iqerreb s lettkal ɣer Ṛebbi. Ad yidir ddaw leɛnaya-ines. Ad yeqqar Awal-is, ad iteddu s Ṛṛuḥ-is.  Ayagi meṛṛa d Lmasiḥ i d-inejren abrid, yessers-d lehna ger Ṛebbi d yemdanen. Akka i d-ibeggen Ṛebbi Leḥmala-ines i yemdanen. A t-naf di Tira, di tebratt n At Ṛuman. « Tura imi nuɣal d iḥeqqiyen s liman, ters-d lehna gar-aɣ d Yillu s Ssid-nneɣ Ɛisa Lmasiḥ. Yis daɣen i nufa abrid s liman ɣer ṛṛeḥma-agi deg i nella tura. Lfeṛḥ-nneɣ, d asirem nesɛa belli a ntekki di lɛaḍima n Yillu.” (At Ṛuman 5: 1-2).

Iḥemmel-aɣ s tidett, yettili yid-nneɣ 

Ttbut a t-naf di Tira. D lemɛahda n Ṛebbi i wid akk umnen yis s wawal-is. Leḥmala n Ṛebbi d ayen ara d-nɛic s tidett di tudert-nneɣ n yal ass. Ɣas llan iɣeblan d iɛewwiqen, Ayagi nettmagar-iten-d meṛṛa. Akka i tella ddunit. D acu kan, s liman nesɛa di Ṛebbi Yettnerni deg-nneɣ usirem d ssber i s ara nqabel yal taswiɛt. Leḥmala n Ṛebbi a nḥus yis, di yal taswiɛt akken tebɣu tili. Telha neɣ diritt. Axaṭeṛ ulac i yzmren a ɣ-ifreq ɣef leḥmala n Ṛebbi. Netta yettili yid-nneɣ kullas. Yettak-aɣ-d tissas d tezmert iwakken ur nfeččel ara.

D Ṛṛuḥ iqedsen i d-ibeggnen leḥmala

S lmasiḥ d Ṛṛuḥ-ines ara neɛqel akken ilaq leḥmala n Ṛebbi i ɣ-d-ibeggen. Lmasiḥ ihemmel-aneɣ yefka iman-is d asfel iwakken aɣ-d-isellek si lmut. Tura yettkemmil yettɛassa fell-aneɣ s Ṛṛuḥ-is i ɣ-d-ifka ad yettili yid-nneɣ, iteddu yid-nneɣ. Yesnernay di liman d ṣṣber.

“Ula di lmehnat,  nettili di lferḥ, axaṭeṛ neẓra lmeḥna tettawi-d ṣṣber, ṣṣber isseǧhad deg ujeṛṛeb, lǧehd deg ujeṛṛeb ittawi-d asirem. Asirem-agi ulac degs lexdeɛ axaṭeṛ leḥmala n Yillu teẓẓa deg ulawen-nneɣ s Ṛṛuḥ iqedsen i ɣ-d-ittunefken.” (At Ṛuman 5:3-5).


Commentaires (0)



Pour ajouter un commentaire il faut être membre du site