Amek d-ttmeslayent Tira ɣef Lmasiḥ?Tira meṛṛa di Lɛehd Aqdim deg-sent licarat yeɛnan Lmasiḥ. Win akken ara d-yasen d amsellek n ddunit. Tuggett n lenbeyya i d-yemmeslayen fell-as. Tuggett n “ymeɣaren n talsa” yellan di Tira, tudert-nsen d lecɣal-nsen d azamul d tiɣri n Lmasiḥ. Aṭas n tedyanin ɣef d-ttmeslayen Tira ara ɣ-d-ibanen am akken d “tidyanin n leslak”.

Am wesfel n Yebṛahim ara yefken “Mmi-s” d tikci i Ṛebbi. Neɣ ma nuder-d tadyant-nni n “waffal n waman” di zzman n Nuḥ. D tadyant i deg d-iban wamek yeḥkem Ṛebbi ɣef ddunit yeccḍen aṭas di lawan-nni. Ma d lbabur-nni n Nuḥ, selken deg-s, Nuḥ d twacult-ines. Leslak-agi ad yili d tiɣri i leslak-nni ara d-yasen di Lmasiḥ.

Lmasiḥ di Tira d lenbeyya

Aṭas n ttebcirat i yellan di Tira iqedsen, uqbel Lmasiḥ. Nezra belli aḥric ameqran yura azal n 1500 iseggasen uqbel Lmasiḥ. Si zzman n Musa. D lenbeyya nniḍen d-yernan si Musa ɣer zdat. Ɣer 500 iseggasen uqbel Lmasiḥ ara wejdent meṛṛa Tira-agi i deg llant ttebcirat ɣef Lmasiḥ. Adlis n Leɛhd Aqdim. A d-awint Tira-agi ɣef tudert n Lmasiḥ, ɣef tlalit-ines, leqdic-ines, lmut-is d ḥeggu-ines.

A d-ilal s lberhan, si tlemẓit yellan d taɛezrit. Ayagi a d-yemmeslay fell-as nnbi Iceɛya, azal n 700 iseggasen uqbel Lmasiḥ. Deg adlis n Iceɛya 7, taseddart 14, a naf yura: “ Degmi, Sidi Ṛebbi s yiman-is a wen-d yefk licara. Atah tɛezrit ad terfed s tadist, A d-tesɛu aqcic, a s-tsemmi “ Ɛimanuil”. (Iceɛ 7:14). Lmeɛna n yisem-agi yebɣa ad yini, Ṛebbi yettili yid-nneɣ. Ṛebbi ad yerzu ɣer ddunit.

Amkan i deg ara d-ilal Lmasiḥ yemmeslay-d fell-as nnbi Mixa. Yella iɛac ula d netta di zzman n Iceɛya, 700 iseggasen uqbel Lmasiḥ. Yenna-d : « I kem, a Bitleḥem Ifrata, yellan d tamectuḥt akk gar igiman n Yahuda, Seg-m ara yi-d-yeffeɣ win akkenni ara iḥekmen ɣef Israil, lecɣal-is si zzman aqdim, d wussan n lebda.» (Mixa 5 :1). Bitleḥem d taddart i deg d-ilul Lmasiḥ. Ur tebɛid ara aṭas ɣef Yirucalim.

Ṛebbi gar yemdanen

Lmasiḥ-agi ara d-ilalen s lberhan, si tɛezrit, ad yili gar yemdanen, ad yidir s tezmert n Ṛebbi. Nnbi Iceɛya yura-d fell-as, d Ṛebbi s timmad-is ara d-yasen gar yemdanen.

“Axaṭeṛ, ilul-aneɣ-d weqcic, yettunefk-aneɣ-d Mmi-tnneɣ,  lḥekma a tili ɣef tuyat-is, ad ittusemmi d amerbuh, d amnesɣamu, Ṛebbi anezmar, Ababat ameɣlal, agellid n lehna.”. (Iceɛya, 9:5). D Ṛebbi ara d-ibeggnen iman-is i ddunit. Ayagi d tabratt n lexbaṛ n lxir i leslak n ddunit.

Ad ikemmel nnbi Iceɛya licarat ɣef Lmasiḥ ara yettunefken d asfel, ad yenneɛtab, ad ḥekmen fell-as yemdanen s lmut. (Iceɛya 53). Ayagi meṛṛa yeɛna asfel n Lmasiḥ i leslak n yemdanen. Ad yemmet ɣef umidag i leɛfu n ibekkaḍen. A d-yawi lehna gar yemdanen d Ṛebbi. Tira meṛṛa bnant ɣef Lmasiḥ yellan d amsellek i d-ihegga Ṛebbi.


Commentaires (0)



Pour ajouter un commentaire il faut être membre du site