Ayen d-iteddun; ayen yuran?Ayen d iteddun, ayen yuran. Yal wa d amek t-ifehhem, t-yettwali. Ayen umi neqqar “lmektub” neɣ ahat “immal yettwajerden”. D acu n tikta ara nettef deg ayen yeɛnan immal, d usirem di tudert s umata. D ayen yellan yakan yewjed yettraju tudert n yal amdan, neɣ yura deg iri n yal tudert. 

Yettili-d umeslay deg ayagi. D ayen neqsed di tudert-nneɣ ara nidir ara nwali, neɣ ahat d ayen iɛeddan akkin i lebɣi-nneɣ n yal ass. Ahat daɣen a nsel i wid ara ɣ-d-immlen immal-nneɣ, s uxeyyel. Am akken llant tedyanin ara d-yeḍrun. Ad asent wehhed-sent kan. A tent-nraju kan mebla ma nefhem lmeɛna-nsent.

Lmut aked tudert ddukulent !

Tella, s tidett yiwet n tedyant i ɣef ur yezmir yiwen ad yeffer neɣ ad iḥiz. Tadyant-agi d lmut. Akken neqqar s teqbaylit, lmut turǧa akk imdanen. Ayagi d ayen ibanen, yella. D tilawt. Kra qqaren, imi lmut tuǧa-yaɣ meṛṛa, yewwi-d ad nelhu kan d tudert.

D acu kan nezra belli, tudert tilisa-ines d lmut. Degmi imdanen meṛṛa seddayen tikli-nsen d lebɣi-nsen skud tettraǧu-ten lmut. S lmut-agi, i yuqlen yemdanen ttmeyyizen deg ayen yeɛnan immal n tudert s umata. Sani ɣer tetteddu tudert.

Tikta n yimmal !

Ameslay ɣef ayen yeɛnan immal n tudert d aɛewwiq meqṛen i yal amdan. Yal wa d amek ara t-iqabel. S ixemmimen, s tikta, s temsalt n ddin d liman s umata. D asekkud n tudert i deg sbedden imusnawen d wid d-yessefhamen timsal s umata. Ɣer imusnawen igrigiyen di lemtel, tudert tuqqel d tadyant iweɛren, truḥ-as lbenna, axaṭeṛ d lmut i yurǧan akk yemdanen. Azal-agi a t-naf di yal asfelsef d ussefhem n ddunit.  Skud mačči aṭas deg-sen i yettamnen s tudert akkin i lmut. Asirem-nsen yeqqim kan dagi di ddunit. Ma d lmut a d-tas am akken d axrib, d tagara yesseḥzanen. D tagara n yal asirem, n yal lebɣi. d tagara n yal talsa.

Timerǧiwt  s liman !

Asekkud nniḍen, d win ɣef d-tettmeslay tikta n Tira iqedsen. Linǧil s yiman-is yebna ɣef lmut d ḥeggu n Lmasiḥ, yellan d azal i tudert n yal amdan. Yella usirem i tudert. Yella yimmal i yal amdan. Tella-d tifrat. Imi Liman di Ṛebbi yeddren yettawi amdan ɣer tewwurt, yelli webrid i usirem. D azal iwulmen iwakken tikta n yimmal ad tesɛu leqrar d unamek. Liman di Ṛebbi yella d lɛinṣer n tudert. D netta i tt-iseddayen ɣer lebɣi-ines. Ayen d-iteddun, a t-nidir s liman. Axaṭeṛ Ṛebbi yella. D tidett. Yenjer-d abrid i yal amdan. Yesbedd tamsisit ger-as d yemdanen iwakken ad idiren yid-s, ad bnun tudert-nsen yid-s, s leɛnaya-ines. Ihi, ɣer tagara, d liman i d tasarut i s ara nelli ticerkett-agi n yimmal n tudert. A d-nini, ayen d-iteddun, d ayen yellan di lebɣi n Ṛebbi yeddren. Nekni a t-nraju s talwit, s liman. Yessa-ɣ-d Lmasiḥ tafat. “D abrid, d tidett, d tudert”. S ḥeggu-ines yelli-d abrid i tudert d usirem. (Yuḥenna 14:6).


Commentaires (0)



Pour ajouter un commentaire il faut être membre du site