Deg ixemmimen n wid yesfelsifen, d imusnawen meṛṛa, asteqsi-yagi ɣef yimal n tudert, icud ɣer layas yesberbren ɣef yemdanen n ddunit meṛṛa. Imi ur yella ara usirem skud tella lmut. D talast i d-iḥeṛṛen lebɣi. Ur yettizmir ara ad yegmu ad yennefli.
D acu kan di Tira iqedsen, yelli webrid i usirem. Tmeslayent-d Tira ɣef Yillu yeddren. Win i d-yefkan tudert. Ɣas akken tella lmut ɣef yemdanen, asirem n ḥeggu yekkes tilisa, yelli-d abrid. S tikta-yagi ara d-yili uzekka d yimal i yal amdan.
Di Tira a naf tudert!
Tikta i d-yettarran asirem i tudert d yimmal n yal amdan, d tin ɣef d-ttmeslayent Tira iqedsen. Imi Ṛebbi yeddren, netta yeɣleb lmut, s ḥeggu n Lmasiḥ si ger lmegtin. Ttmeslayent-d ɣef Yillu i zemren ad isellek imdanen si lmut. D wagi i d lexbar n lxir. Liman di tudert n dayem, s ḥeggu n Lmasiḥ, d ayen ara d-yefken azal i tudert n yal amdan. Asirem n yemdanen ur yettili ara dagi kan di ddunit, lameɛna akkin i tudert. Kra n win yumnen s Lmasiḥ, ad yidir akkin i lmut. D wagi i d asirem yellin abrid.
A nwali di linǧil Lmasiḥ yerna i ɛac acḥal n wussan di lqaɛa, aked yemdanen, iban-asen-d. D tilawt n tudert-is. D tilawt daɣen belli, kra n win ara yamnen yis ad yidir ula d netta. Yili tudert-is tcud ɣur-s, ad yesɛu asirem. Tudert n yal amdan yumnen a ttili d tin yellin ɣer tudert n dayem, akkin i lmut.
Tudert s lebɣi n Ṛebbi!
Tudert n wemdan mačči d tin ara yettraǧun kan melmi ara d-tass lmut. D tudert yebnan ɣef liman di Ṛebbi yedren. D tudert yettraǧun ɣer teɣdemt-is d wayen akk yelhan ama di tudert-is ama di tudert n wid aked d-yettɛici. Azal meqqren i yal amadan di tudert-is, d leḥmala n Ṛebbi, tiɣin n wawal-is, d leḥmala n wiyyiḍ.
Yeǧǧa-d Ṛebbi lumurat-is i yemdanen iwakken ad idiren di liser d leɛnaya. Yis-n ara yizmiren ad ssikden deg immal n tudert. Ad idiren ddaw leɛnaya-s, ddaw lumurat-is. Netta yeḥkem s tnaya. Ayen akk i d-iḥer igenni d lqaɛa yella ddaw udabu n Yillu. Yerna yefka-d i yal amdan tilelli iwakken ad yeṭṭef abrid zdat-s, ad yegmu di tudert-is. Ma d leqrar ad yili di liman d wul zeddigen i s ara yettidir dagi di ddunit, ad yernu ad yerǧu tagara di liser d rrezg. Akka i gella di lebɣi n Ṛebbi.
S tudert n lmasiḥ, s lmut-is d ḥeggu-ines, i yesɛa yal amdan asirem di tudert-is. Asirem ɣer tagara ara iɣelben ula d lmut. Akken i tt-yeɣleb Lmasiḥ.D netta i d leqrar i d leɛnaya i tudert n yal amdan. D netta i d asirem s tidett. Ad yissin wemdan Illu d leslak i d-yefka. Akken i t-id yenna Lmasiḥ deg awal-is, di Linǧil n Yuḥenna:
«Tudert n dayem d asmi ara yissinen yemdanen belli d kečč i d Illu awḥid, Illu n tidett, ad issinen daɣen Lmasiḥ, win akken i d-tecggɛeḍ.» (Yuḥenna 17 :3).
