Grace through the crossD ayen yexdem Lmasiḥ ɣef umidag, asfel-ines, i yefkan i wemdan ttawil i s ara iqeṛṛeb ɣer ṛṛeḥma n Yillu. Ɣer umidag i yeqsed Ṛebbi ad yemlil d wemdan yellan d amednub yakan. Idammen n Lmasiḥ yuzzlen d asfel ad ssirden ddnub n wemdan taswiɛt i deg ara yeqbel asfel-nni i tudert-is d leslak-is. Ad nass ɣur-s a neqbel tikci-ines n ssmaḥ d leɛfu. Akka i yella di lebɣi n Yillu mi d-yefka Lmasiḥ d asfel i ssmaḥ.

S ccɣel yennekmalen n Lmasiḥ. D ccɣel yellan d azedgan, d asfel yellan d aneblal. D asfel yettunefken yiwet n tikelt kan ɣef ddunit meṛṛa. D tukci s ṛṛeḥma sɣur Ṛebbi.  . Di linǧil n Yuḥenna ara naf azal-agi n leslak yellan di Lmasiḥ. Yis i d-bann ṛṛeḥma n Yillu i yemdanen. D Lmasiḥ i d allel n leslak s wesfel-ines. A t-nɣer deg ixf wis tlata taseddart 15 d 16: “ Iwakken s kra n win yumnen yis ad yesɛu tudert n dayem. Sidi Ṛebbi iḥemmel imdanen n ddunit meṛṛa armi i d-yefka Mmi-s awḥid iwakken kra n win yumnen yis ur yettmettat ara meɛna ad yesɛu tudert n dayem”.

Sidi Ṛebbi yettraǧu deg-wen ad tamnem s win i d-iceggeɛ !

Ṛṛeḥma n Yillu tban-d ɣef umidag. Ayen yexdem Lmasiḥ yili d leɛnaya ara yuqlen d leslak i wiyyiḍ. Swakka, yal amdan yezmer ad iqeṛṛeb ɣer Yillu s lettkal. S liman di Lmasiḥ yemmuten d asfel i leɛfu n ddunab. Ilaq kan a nfiq belli ayagi akk d ṛṛeḥma d ssmaḥ sɣur Ṛebbi. Ur yezmir ara wemdan a d-yerbeḥ ayagi s lecɣal-is netta. Mačči d ddin. D liman kan s wul ara yellin abrid ɣer leslak. Akken i t-id-yenna Yuḥenna deg ixf wis setta : “Sidi Ṛebbi yettraǧu deg-wen ad tamnem s win i d-iceggeɛ! ”    
  
Ayen i s iɛuhed Ṛebbi imdanen iban am tafat. Ma neqbel Lmasiḥ d amsellek, numen s wayen yexdem fell-aneɣ, numen s wesfel-ines d idammen-is yuzzlen, a d-nɣellet s liman ssmeḥ d tudert n dayem s leɛnaya. D acu kan daɣen, mada gella ur yeqbil ara wemdan tikci-agi n ssmaḥ, d wesfel n Lmasiḥ, atan ad yeqqim ddaw deɛwessu n ddnub d tuccḍa. Ad yeqqim yebɛed ɣef ṛṛeḥma n Ṛebbi. Mebla leɛfu d ssmaḥ i d-yewwi Lmasiḥ, ulac tifrat. Ulac leslak. Axaṭeṛ ddnub yeɣleq tiwwura n tudert ɣef ddunit meṛṛa. Akka i yura di Linǧil: “ Win yumnen yis ur ittuḥaseb ara, ma d win ur numin ara atan yettuḥaseb yakan, imi ur yumin ara s Mmi-s awḥid n Sidi Ṛebbi.” (Yuḥenna 3: 18). D azal meqqren. Leslak yettunefk-d s tidett. Ɣer tagara:
“ Win yumnen s Mmi-s yesɛa tudert ur nfennu; ma d win ur numin ara s Mmi-s ur yettwali ara tudert, urrif n Ṛebbi yezga fell-as.” (Yuḥenna 3:36).

Yiwen n leslak, d zik d tura !

Ɣer tazwara yettunefk-d lameṛ i Adem ad iḍuɛ Illu, a s-yaɣ awal. Lameɛna yecceḍ yezgel leqrar-nni. Di lǧerra-s talsa meṛṛa teɣli deg ubekkaḍ, di ddnub. Degmi lmut tegla s ddunit meṛṛa. D acu kan, i lmend n ṛṛeḥma-ines, yefka-d Yillu taswiɛt d ttawil i s ara d-yerbeḥ tudert d leɛfu yal amdan. Mačči s lecɣal lameɛna s liman kan di tukci-agi n Ṛebbi, yellan di Lmasiḥ. D asfel n Lmasiḥ. Win t-iqeblen yumen yis a d-yerbeḥ ṛṛeḥma d lehna sɣur Ṛebbi. Di tebbratt Iɛebṛaniyen yura: “ Amek ara nemneɛ ma yella ur neḥsib ara leslak ameqqran yecban wagi ? ” (Iɛebṛaniyen 2:3a).


Commentaires (0)



Pour ajouter un commentaire il faut être membre du site