Asteqsi ɣef lmalayek?Tazwert ɣef txelqiyin

Deg ayen akk i d-yexleq Yillu, deg igenwan d lqaɛa, di tudert meṛṛa, mačči ḥala imdanen i yellan s tegzi d leɛqel. Tira iqedsen ttmeslayent-d aṭas ɣef txelqiyin nniḍen, yesɛan tigzi, yettilin deg genwan, ccɣel-nsent d leqdic zdat Yillu. Ṣṣawaḍent ɣer Yillu aked txelqit-ines s umata. Ccɣel n txelqiyin-agi, d timceggɛin ger Yillu aked txelqit-ines.

 D timceggɛin ger Yillu d yemdanen. Tixelqiyin-agi d lmalayek. Isem n txelqiyin-agi, "Lmalayek", d awal i d-yekkan si tutlayt taɛibṛanit aked tramayit. Yellan d tutlayin n usamar. Anamek n lmalayek, yebɣa a d-yini imceggɛen. S unamek-agi daɣen n "imceggɛen" i yettusuqel yisem n lmalayek ɣer tutlayt tagrigit. Qqaren-sen "angellus", yeɛni "amceggeɛ, imceggɛen". Llan ulamma llan ger imaziɣen wid yessexdamen isem-agi n tegrigit "aneglus" iwakken ad inin "lmalayek". Seg ẓar-agi n tegrigit " angellus" i d-yekka daɣen yisem n lmalayek di tutlayt tafṛansist "ange".

Tigzi, tudert n lmalayek

Deg ayen yeɛnan lmalayek neẓra belli aṭas i yettamnen yis-n, ayagi di yal tikta n ddin d wansayen n yemdanen s umata. Imdanen ttamnen s txelqiyin-agi yellan akkin i lqaɛa. D tixelqiyin igenwan. Yewwi-d lḥal a nessiked ɣer Tira iwakken a nwali d acu i d-qqarent deg ayen yeɛnan lmalayek. Yella daɣen di Tira wayen yellan d sser, d adrig, ɣef lame.r-agi n lmalayek. A neqqim kan di leqder n wayen yuran yettujerden s tilawt. D acu kan, iban am tafat talit llan lmalayek d leqdic-nsen d ugama-nsen. Llan deg genwan d igiman, s tegzi s tudert. Axaṭeṛ mačči kan di lqaɛa, ger yemdanen kan i tella tudert d tegzi.

D igiman deg igenwan

Ula deg igenwan tella tudert, yella ccɣel meqqren. Tella tegzi yeftin aṭas. Ɣas ulamma ayen yellan deg igenwan yezga-d ahat yebɛed, yeffer ɣef tmusni n yemdanen. Ayen tewwi lqaɛa d aḥric, ayen daɣen yellan deg igenwan d aḥric nniḍen yerna d win meqqren. A naf yura deg adlis n "Uweḥḥi", ɣer tagara n "Lɛehd ajdid", d igiman n igiman n txelqiyin i yellan ( Aweḥḥi 5: 11). Lexbar n wayen akk yettilin deg igenwan, d ayen yessefraḥen imadanen. Mi ara t-afen a t-ɣren, a sen-yili d lferḥ meqqren, d tissas i liman-nsen. Axaṭer tamsalt n igenwan d wayen yellan deg-sen, d ayen yeɛnan daɣen tudert n yemdanen. Imi nezra belli iswi n lqaɛa aked igenwan d yiwen.

D tizemmal s tezmert

Imi lmalayek zgan-d d ilemmasen, d imceggɛen ger Yillu aked yemdanen. D tama meqqren n leqdic-nsen ɣef i ttuweklen si tazwara. Lmalayek, tixelqiyin-agi yesɛan tigzi, acḥal d abrid i d-banen i yemdanen. Ttasen-d ɣer yemdanen tikwal di tirga, tikwal di tilawt n wass, yerna ttbanen-d s ṣṣifa n yemdanen. Yerna lmalayek deg aṭas yid-sen, d agraw, d tazemmalt meqqren, s leḥkem d tuddsa. Ɣef uqerru-nsen yella Lmasiḥ, d agellid fell-asen. Aṭas n yismawen daɣen i s d-ttmeslayent fell-asen Tira, iwakken ad beggnent leqdic d tezmert-nsen. D tizemmar meqqren, d iduba, d wid yesɛan ccan meqren, d leḥkem. A naf ayagi di Ifasus 1:21, At Kulus 1:16.


Commentaires (0)



Pour ajouter un commentaire il faut être membre du site