Early church fathersTebda-d tikli n tmezgida s tnagit n inelmaden imezwura. Ḥekkun-d ɣef wayen walan d wayen slan.

D tasuta tamezwarut n teflest, ara d-inejṛen abrid a d-erẓ asalu I tid d-iteddun. Lawan deg yemmut Lmasiḥ d asfel ɣef umidag, ad yili deg useggas n 30. Ma d tira n lɛehd ajdid, a nraju alamma d aseggas n 50, I deg ara d-tban tebratt tamezwarut, d tin i d-yura Bulus I yimezdaɣ n Galassya, di temnaṭ n Ṭṭurk n wass-a. Ger sin n wakuden-agi, nezmer a d-nini, d talit n tafrara n tudert ara d-yegmun deg umezruy n tmezgida.

Isallen n leslak ttawḍen si tama ɣer tayet, wa yeqqar iwa. S yimi kan I yettazzal lexbar ger yemdanen. Urɛad yakan ttujerden deg iḍrisen isallen-agi yeɛnan Lmasiḥ. D acu kan d inagan yeddren, iɛacen ayen akk d-yeḍran. Tudert, Taɣlift, aselmed, lmut d ḥeggu n Lmasiḥ. D inagan n tidett. Yellan ɛacen aked Lmasiḥ. Slan I uselmed-ines, wallan-t s wallen-nsen. Ḥeḍren itedyanin merra n tudert-is. Lmut-is, ḥeggu-ines d walluy-ines ɣer igenni. Nezmer a d-nini d tanagit tamezwarut. Iteddu wawal-nsen di tmura akk I d-yezzin I Yerucalim.

D acu-t yizen-nsen ɣer tazwara ?

D lexbar n lxiṛ yeɛnan leslak. D izen n leslak. D asiweḍ n tebratt d uselmed n Lmasiḥ. Ayagi a t-naf di sin n leɛwanṣer imezwura di Tira. Yiwen deg-nsen, d ayen d yura Luqa, deg adlis n Lecɣal n yemcegɛen, anda d yemmeslay Buṭrus, yellan seg inelmaden imezwura. D anagi n tidett. Deg ini-ines di temdint n Yirucalim, zdat imezdaɣ-is d wid meṛṛa yellan dinna i d-yusan si tmura nniḍen, d iminigen neɣ arzan-d kan. Dinna yemmeslay-d Buṭrus, yesbedd s imeslayen-is, tanagit yeɛnan Lmasiḥ. D amsellek d yemdanen meṛṛa skud umnen yis. Yerna daɣen Buṭrus yesfehm-d ayagi, ɣer tazwara, mi akken yerza ɣer Kurnilius.

Lɛinṣer wis sin, d ayen d yura Bulus s timmad-is. D ayen i wumi yesla syur imezwura. Netta ijerred-it-id di tebratin-is. D ayen yesla ḥekkun-d fell-as inelmaden imezwura. A naf ayagi di tebratin yura i yikurantiyen d imezdaɣ n Ṛuma. D izen yeɛnan Lmasiḥ. Lmut-is d ḥeggu-ines ass wis tlata. D azal i leslak n yemdanen.

Ama d ayen d yenna Buṭrus, ama d ayen d yura Bulus, deg ini-nsen, a nefrz, a neɛqel, akk ttebcirat yellan di temsissit taqdimt, d tid ara yettwakemlen di Lmasiḥ. Axaṭer ayen akk yuran di lɛehd aqdim yeɛna-t. D netta i d asfel-nni i d-ihegga Yillu si tazwara, i leslak n yemdanen. Lmasiḥ tura yelli abrid i lɛehd ajdid. D leslak deg isem-s, s yisem-is.

 


Commentaires (0)



Pour ajouter un commentaire il faut être membre du site