Amek i d-yewwi a nefhem Lmasiḥ yellan d Mmi-s n Ṛebbi?Lmasiḥ Mmi-s n Ṛebbi, d talɣa yessewhamen acḥal d amdan. Kra n yemdanen staqsayen ad fehmen am akter, kra nniḍen ggumman ad qeblen ayagi, wiyyiḍ tɛjben kan qqimen ttmeyyizen deg-s.

Seg yiwet n tama, acḥal n wid I s-yennan belli, ahat imasihiyen umnen kan belli, Ṛebbi s timmad-is yerza-d ɣer Meryem, yesɛa-d yid-s aqcic akken d-ttarwen akk yemdanen di ddunnit. Ayagi d leɣlaḍ meqqren. Ur d-yewwi ara I leɛqel n wemdan ad yeqbel tamsalt am tagi. Lmasiḥ d Mmi-s n Ṛebbi mačči di lǧetta d ugama n wemdan. Liman amasiḥi ur yesselmad ara tikta-yagi.

Tira iqedsen ttmeslayent-d ɣef Mmi-s n Ṛebbi s wudem n Ṛṛuḥ. D azal, d awal, d anamek yellan deg ul n Ṛebbi. Azal-agi icudd ɣer leqdic n Lmasiḥ iwakken ad yesnekmal tamsissit yesbedd Ṛebbi I leslak n yemdanen. Lmaṣiḥ yekka-d sɣur Ṛebbi s Ṛṛuḥ iqedsen, yusa-d ɣer yemdanen iwakken ad sen-yenjeṛ abrid n leslak.

Sidi Ṛebbi d Ṛṛuḥ. Ayen akk d itekken sɣur-s ama d awal ama d leqdic ama d kra n llameṛ, yewwi-d lḥal a sen-meyyez s tikta n Ṛṛuḥ. Mmi-s n Ṛebbi yella-d s Ṛṛuḥ, iɛac s tdukli n Ṛṛuḥ netta aked Ubabat yellan d Ṛebbi ixelqen igenwan d lqaɛa.

A nessiked kan ɣer tlalit n Lmasiḥ iwakken a neɛqel assaɣ t-icudden ɣer Ṛebbi. Assaɣ-agi d Ṛṛuḥ iqedsen s timmad-is.

Deg ixf amezwaru n Luqa, m’akken d yerza lmelk n Ṛebbi ɣer Meryem yenna-yas:  “Ur ttaggad ara a Meryem! S ṛṛeḥma-s tameqqrant, Ṛebbi yextar-ikem. Atan a ttrefdeḍ tadist, a d-tesɛuḍ aqcic, semmi-yas Ɛisa, ( yeɛni: Amsellek).  Ad yesɛu ccan d ameqqran, ad ittusemmi Mmi-s n Ṛebbi ɛlayen. Sidi Ṛebbi a t-yerr d agellid akken I t-yella Dawed, yiwen si ljdud-is. Ad yeḥkem ɣef tarwa n Yeɛqub I dayem, tageldit-is ur tfennu ara.

Meryem tenna I lmelk-nni:  Amek ara d yeḍru yid-I wayagi nekk ur nezwiǧ ara?

Lmelk yerra-yas: atan a d-yers fell-am Ṛṛuḥ iqedsen; tazmertn Ṛebbi ɛlayen a kem-tɣumm am tili, daymi aqcic-agi imqeddes ara d-ilalen ad ittusemmi Mmi-s n Ṛebbi.”

Ulac win d-ilulen akka am Lmasiḥ. S Ṛṛuḥ iqedsen I terfed Meryem s tadist. Tella d taɛezrit ur tessin ara argaz yakan. S lebɣi n Ṛebbi d tezmert-is I d-illul Lmasiḥ.


Commentaires (0)



Pour ajouter un commentaire il faut être membre du site