Anebdu n useggas-agi yegla-d s tlalit n yiwen uwanek d amaynut. Anẓul n Ssudan yewwi timmunent-ines. I tikel tamezwarut deg umezruy-ines, yesbed tamurt d uwanek-is. Ayagi yeḍra-d melmi kan, ass n tẓa si yulyu 2011. Kra n wussan kan di leɛmeṛ n uwanek-agi n Wanẓul n Ssudan.
Aɣref akken ma yella, yezdi yeddukel am yiwen, yeffeɣ-d ɣer iberdan s lferḥ d uslilew, ad ibeggen I ddunit meṛṛa asirem-is d tlelli-ines. D tameɣra di yal tamnaṭ di yal aɣaram, di yal taddart. Ma d tamdint tamaneɣt yettusemman “ Yuba”, teččuṛ tenneqlab si lɣaci i d-yerzan ɣur-s si tmurt meṛṛa.
A s-nmenni teɣzi n leɛmeṛ d lehna I weɣref d udabu n tmurt-agi tafriqit.
D agdud yenneɛtaben aṭas iwakken ad yeṣṣiweḍ ass-agi ɣer usbeddi n tmurt-is. D igiman I yeɣlin d imaɣrasen ɣef akal-nsen d nnif-nsen; d aɣref I yqublen taɛṣirt d uzaglu. Ugar n xemsin iseggasen netta d amennuɣ ɣef tlelli d wezref.
Ass-agi yeffeɣ leɛtab-is ɣer tafat. Tbedd tegduda n Wenẓul n Ssudan.
Amennuɣ n weɣref-agi, annuz d ssber I s-iqubel tameḥqranit d ddɣel, d amennuɣ ara yilin daɣen d amedya d tissas I yɣerfan nniḍen yettnadin ula d netni ɣef tlelli n tmura-nsen. Imi s kra n win iteddun ɣef tidett yeṣṣawaḍ…
Ndeɛɛu ɣer Ṛebbi iwakken ad iḥun ɣef tmurt-agi d wegdud-is, a ten yawi deg webrid n lehna, ad sbedden taɣdemt d wezref, ad zḍen tagmatt yernu ad nneflin am netni am leǧnas n ddunit meṛṛa.
D asirem ara nerfed seg ul, a t-necrek d yegduden akkit iteddun deg webrid n tlelli.
