Di tmurt n leqvayel, ddurt-agi, ger tedyanin meṛṛa i yceɣben imdanen, nebla ccek d awezlu n weḍlib n Lwennas Matub. Ccreɛ yeḥkem ɣef sin-nni yettwardan s wanɣa. Yeffeɣ-d uzaraf, d tafagurt tihrit mgal-nsen di sin yid-sen. Akka i d yeffeɣ lexbaṛ !
D acu kan, wigini i ɣef yeḥkem ccreɛ, netni ur d-qerran ara s weḍlib-agi d-yersen fell-asen. Di sin yid-sen cehden-d belli ur ttekkan ara di tedyant-agi. D iseggasen netni di lḥebs, ttɛawaden-d ttalsen-d, ur ttekkan ara di lmut n Lwennas, d imelsa deg wezlu-agi.
Ama d tawacult n Lwennas Matub, ama d lɣaci akkit d-yusan zdat n wexxam n ccreɛ, d wid akkit yessaramen ad bin tidett n uwezlu-gi, yiwet n tikta i yteddun di lbal-nsen akken ma llan.
Ifassen yenɣan Lwennas, mazal-iten urɛad ttwaqnen. Mazal-iten s lḥenni !
Mačči kan d awezlu-agi n Lwennas i ɣef tesberber « taɣdemt » di tmurt-nneɣ. D acu ara d nini deg wezla nniḍen. Seg wid akk yeɣlin di tefsut taberkant, d uselway Buḍyaf, d wiyyiḍ akkit yeɣlin di lbaṭel. Imi mazal luɣen waman. Acemma ur d-yeḍhir.
Anida-tt tidett ? ar melmi ara d-tbin ?
Yeqqar-d yiwen n lemtel : «Akken tebɣuḍ ɣezzifeḍ a yiḍ, leqrar ara d-yali wass!» Tikkerkas ur ttdummunt ara. Akken d-ssant ara fsint am udfel. Ad yettukellex wegdud yiwen wass, lameɛna d lmuḥal a nekemmel a neskiddib fell-as yal ass...
Ulac tamurt, timeṭṭi, neɣ agdud i zemren ad innefli mada gella ur yesser-s ara ɣer lsas azalen n teɣdemt d wezref. Lemqadra n tudert. Lemqadra n izerfan. Amezwaru deg-sen akkit d win n tudert.
Asirem ara d neǧǧ deg ulawen, d win d yusan si lɛinṣer n tudert, d awal d yenna Lmasiḥ:
"D nekk i d abrid, i d tidett, i d tudert". Lmasiḥ yerẓa-d asalu, yenjer-d abrid i usirem d tudert.
D netta i d agellid n lehna. D agellid n teɣdemt. Izarafen-is bnan ɣef tidett.
