Kahin d Habil
Amezwaru n dderya i d-ilulen di ddunit, d aqcic. Adem d Ḥewwa, imawlan-is, semman-as Kahin. Kra n lweqt ɣer zdat, ilul-d weqcic nniḍen di twacult-agi tamezwarut. Aqcic-agi i d-yernan ittusemma Habil.
Akken llan ttimɣuren, sin n watmaten-agi, yal yiwen d ccɣel yeḍfar. Habil yella ikess ulli n baba-s. Yettawi-ten deg almaten yelhan, anda llan waman. Yettɛassa-ten daɣen seg iɣersiwen. Kahin, netta, iḥemmel ad ixeddem akal. Izerreɛ imegger.
Lxedma-nsen temxallaf, d acu kan di sin yid-sen, sɛan taflest deg Illu n tidett. Yusa-d lweqt i deg ara qeddmen asfel i Yillu. Yal yiwen yextaṛ ssenf n lweɛda ara yqeddem i Ṛebbi. Kahin yewwi-yas-d si lɣella n wakal-nn i i yxeddem. Tukci n Habil temxallaf. Iddem-d yiwen seg imenza n tejlibt, yezla-t, iqeddem-it i Yillu.
Yura deg Adlis: " Yeqbel Yillu Habil d lweɛda-ines, lameɛna ur yerri ara ddehn-is ɣer Kahin d lweɛda-ines ". Yerfa Kahin, yeččuṛ d tismin, imi yeqbel Yillu izimer i yqeddem gma-s Habil, yerna yuggi lweɛda-nni n lɣella n wakal. Yehmel dɣa yenɣa gma-s. D tamgeṛt tamezwarut.
Yerfa Yillu mgal Kahin. Axaṭer yenɣa Habil. Imerret-it Yillu s leqseḥ. Issers-d fell-as abxas i lmend ubekkaḍ-nni yexdem. Seg uḍlib-nni yexdem, yettumerret tudert-is meṛṛa, yettwaqecceɛ-d si talit n Ṛebbi. Akal-nni i deg ixeddem, yuqel ur d-yettak ara lɣella. Netta, iteddu yettmenṭar di lqaɛa tudert-is meṛṛa. Ddnub yettawi-d beṭṭu aked Yillu.
Am Kahin am Habil, yal yiwen yumen s Ṛebbi. D acu kan d yiwen kan deg atmaten-agi i d-yettwaqeblen. Yura deg Adlis : " s liman i yqeddem Habil asfel i Ṛebbi, azal-is uger n win i yeqeddem Kahin ". Asfel n Habil, ibeggen-d taflest-is di ṛṛeḥma n Yillu. Ur teqqim ara kan ma numen s yiwen n Ṛebbi. Mačči kan imi ɣur-neɣ lebɣi a neɛbed Ṛebbi, a s-nmud si lxedma n ifassen-nneɣ, si lecɣal-nneɣ yelhan. Ayen yesɛan azal, d talit n wul. Am Habil, ilaq a nqeṛṛeb ɣer Yillu s ṣṣfa n wul s wannuz. Asfel ara nmudd i Yillu, ad yili d win akken yettraju deg-neɣ.
Lweɛda n Habil deg-s asfel n izimer i wumi uzlen idammen. Asfel-agi d amezwaru akk di ddunit, deg ayen d-yumeṛ Yillu, alamma d yusa ɣer ddunit "Win" akken i wumi qqarent Tira " Izimer n Ṛebbi ", yettuhegga-d, d win akken ara yilin d asfel, yiwet n tikelt, i leɛfu n ibekkaḍen-nneɣ.
D acu-t ihi, i nekni ass-agi, usfel ara yeqbel Yillu ? Amek ara naff ṛṛeḥma d leɛfu zdat Yillu ? Kemlet ihi taɣuri n temsirin i d-iteddun, ad temlilem tirirrit i tuttriwin-agi !
Uqbel ad tekmlem di tɣuri, arret-d i umesteqsi 3
