Yella Musa si ger iɣella i d-yufraren akk deg umezruy. Isedda uger n umelyun n yemdanen deg yiwen n yinig yeṭṭfen rebɛin n iseggasen. Ass-agi, a ɣ-d-ibin d tisselbi lukan a neɛṛeḍ a nseddu tuggett am tagi yerna deg uneẓruf. D acu kan, s yiɣil n Yillu, yeṣṣaweḍ Musa ccɣel-agi yellan d awezɣi. Yyaw a nessiked ɣer tudert n wergaz-agi ameqṛan.
Ilul Musa du Maṣer. Imawlan-is seg At Israil, llan d aklan ddaw tgeldit n Ferɛun ameqṛan, agellid n Maṣer. Deg akken yugad Ferɛun ad ǧehden wat Israil, segmi ttnernin, yeqsed ad yessenqes deg-sen, yefka-d lameṛ, ad yettwaḍegger s asif kra n weqcic ara d-ilalen ger waklan, akken kan d aleqqaq. Mi d-ilul Musa, yemma-s tugad ula d netta ad yettwaḍeggar s aman. Dɣa teffer-it deg uxxam tlata wagguren. Mi tuqel ur tezmir ara a t-teffer, txedm-d aḍella, tesleɣ-it, terra deg-s Musa. Tessers-it ger uɣanim, iri n wasif. Yell-is n Ferɛun tṣubb-d s asif a tteccucef dɣa twala aḍella-nni. Telli-t dɣa tufa deg-s llufan. Tḥun fell-as, tefka-t i tin ara t-yeṣṣutḍen. (Tagi ara t-yeṣṣutḍen d yemma-s n llufan). Yuɣal tefka lameṛ iwakken ɣer zdat ad yetturrebi, am mmi-s, deg uxxam n Ferɛun.
Akken yettimɣur, yeɣra yegma-d Musa di Maṣer. Ɣas akken deg iɣrem n Ferɛun i yɛaac, Musa yeḥsa belli ur yelli ara d amaṣri. Yiwen wass, iwala yiwen umaṣri yekkat yiwen n wakli asraili. Dɣa yerfa axaṭer ula d netta n wat Israil. Yella di Tira : " Immuqel yal tama, akken iwala ulac win yellan, yenɣa amaṣri-nni ". Mi yesla Ferɛun s wayen d-yeḍran, inuda ad ineɣ Musa. Lameɛna, yerwel Musa, iṛuḥ ɣer tmurt nniḍen.
Yiwen wass, mi yella ikess lmal, iwala yiwen udernu akken ireqq. Times-nni txulef ayen akk ireqqen nniḍen. Tecɛel tmes deg dernu lameɛna ur ireqq ara. Mi i yqeṛṛeb Mussa ad iwali, teɣra-yas-d taɣect: " Mussa ! Mussa ! " Mussa yerra: " aqel-iyi ". D Ṛebbi i d-yettmeslayen i Mussa seg udernu-nni. Yenna-yas: " Ur d-ttqeṛṛib ara ɣer dagi, ekkes irkasen-is seg ḍaṛṛen-ik, axaṭer amkan-agi i deg tbeddeḍ d akal zeddigen ". Yerna yenna-yas, yesla i ysuɣan n waklan di Maṣer, a ten-id-isellek. Iwekkel Yillu Mussa s ccɣel meqqṛen: " A k-ceggaɣ ɣer Ferɛun, a d-ssufɣeḍ At Israil si Maṣer ". Yerra-yas Mussa: " D acu-yi, iwakken ad ruḥeɣ ɣer Ferɛun, a d-ssufɣeɣ si Maṣer arraw n Israil? ". Yenna-yas Yillu: " Ad iliɣ yid-k ".
Yuɣ awal Musa, iruḥ ad yeḍleb i Ferɛun ad iserreḥ i waklan. Ferɛun yestehza di Musa, yenna-yas, ur ttefɣen ara waklan si Maṣer. Dɣa icegga-d Yillu lehlak ɣef imaṣriyen imi yugi Ferɛun ad yeǧǧ at Israil ad fɣen si Maṣer. Aman akk n tmurt uqlen d idammen; teččur ddunit s imqerqren; d tillicin, ibzaz di tmurt meṛṛa. Lmal yeɣli yehlek, tlata wussan d ṭṭlam. Isexḍ-d Yillu tamurt n Maṣer seg akken yugi Ferɛun ad iserreḥ i Wat Israil. Asxaḍ-agi d-yeɣlin ɣef Maṣer ur isuma ara aklan.
Iṛuḥ daɣen Musa ɣer Ferɛun, yenna-yas, imi ur yuɣ ara awal i Yillu, a d-iceggaɛ Umeɣlal tiyyita-nniḍen ɣef Maṣer. Deg iḍ, amenzu n yal twacult ad yemmet, ula d imenza n lmal.
S lameṛ n Yillu, iweṣṣa Musa arraw n Israil ad zlun izimer di yal axxam, ad ḍlun idammen-nni, ɣef yiran n tewwura-nsen. Akken ad menɛen seg uzaraf n Yillu. Lmelk n Umeɣlal ur d-ikeččem ara axxam i deg ara ḍlun idammen. Deg ixxamen akk anda ulac idammen yeḍlan, lmelk n lmut ad yewwet meṛṛa imenza, seg imdanen alamma d lmal. Yenna Yillu: " ad waliɣ idammen, ad ssurfeɣ fell-awen ". Deg iḍ-nni, aṭas i yemmuten di tmurt n Maṣer. Ma d aklan netni menɛen si lmut, axaṭer ḍlan idammen ɣef tewwura.
Ɣer zdat deg uneẓruf, yumeṛ Yillu i Musa ad yuqem iseflawen ɣef ddnubat n wegdud. Iseflawen-agi a t-menɛen seg zaraf n Yillu. Mačči kan d iseflawen ɣef ddnubat n yal ass aked tucḍiwin n yal yiwen, yella daɣen yiwen n wesfel yal aseggas, i wegdud meṛṛa. Ttuqedmen sin iqelwacen: yiwen uqelwac ad yeṭṭef amkan n wegdud, idammen-is ara yenneɣlen ad ɣummen ibekkaḍen (ddnubat) n wegdud, zdat n Yillu. Aqelwac nniḍen, d " aqelwac amsifeḍ ", ad ittuserreḥ deg uneẓruf, ad iɛebbi yid-s ibekkaḍen akk n wegdud. Lumuṛat-agi, mmalent-d belli Ṛebbi ad yeɛfu ddunbat ɣef ddemma n idammen n iseflawen. " Mebla tazla n idammen, ulac asuref " i d-yenna Wedlis n Tira.
Swakka i yhegga Yillu agdud, ɣer tisin n Win akken ara yettunefken d asfel, s idammen-is netta, i yemdanen meṛṛa, di mkul lweqt.
Tura, uqbel a ttaẓem ɣer zdat, arret-d ɣef yesteqsiyen n temsirt-agi.
