Si zik ar tura, ulac agdud neɣ lǧens ur d neǧǧi later-is deg umezruy. Ama s trad, ama s tmusni d wesnulfu. D tadamsa, d tasertit neɣ d taɣuri. Igduden teddun di tikli n umezruy. Xeddmen amezruy. Later n tɣerma di yal lweqt si yal agdud di ddunit, a t-naf di yal tamzikent I ɣer ara nerzu, neɣ di yal adlis ara nɣar.
Ɣer wanida teddun yegduden s umata, d acu-ten yeswiyen-nsen, iwacu ttenherwalen wwagarasen, ayɣer d-yettili trad ger yegduden, ayɣer daɣen ttilint-d tegrawliwin ulamma daxel n yegduden deg iman-nsen, di tmeṭṭiyin-nsen, ger weɣref d udabu…
Isteqsiyen-agi meṛṛa ẓdan-d tikli n umezruy n yegduden. Werǧin d-tella kra n teswiɛt-kan n lehna, n trusi, ger yemdanen, ger yegduden. D ccwal d amqellaɛ di yal tasuta, di yal amkan. D tazla ɣer udabu, ɣer cci.
Ttilint-d daɣen tegrawliwin, d anadi ɣef tlelli d izerfan. Seg akken ddɣel n kra n ineḥkamen a t-naff iɛedda tilas. Ttnekkaren-d yemdanen ɣef lḥeq-nsen. D amennuɣ ɣef izerfan n tudert s umata. D tamɛict d lxedma; d tanezduɣt, d leqraya iwatan, d izerfan n wergaz d tmeṭṭut, d izerfan n yidles d tutlayin.
Acḥal n igelliden d ineḥkamen iseddan timura-nsen s teɛsirt d lbaṭel. Igduden-nsen ttidiren di yir liḥala. D laẓ d uqehher I d “yal ass-nsen”. Ineḥkamen-agi ṭṭfen adabu am akken d taḥanutt-nsen. Ur ttcawaren ur ttḥessisen I yegduden-nsen. ČČan sswan netni d dderya-nsen. D at iɛebbaḍ yerwan, yexwan. Ur d-cqiɛen deg wiyyiḍ.
Lbaṭel xeddmen iɛedda tilas. Ma d agdud netta yettidir di lmeḥna. Yeqḍa layas.
Tasarut attan di tikli n yal amdan. Ama d win iḥekmen ama d win ur neḥkim. Tigzi tamezwarut akk, a ttili d tegdi n Yillu, d tikli di lemqadra n yemdanen. Yesnejmaɛ-d Lmasiḥ deg awal-is ayen yellan d aṣaḍuf n tudert. Yenna-d: “ a ttḥemleḍ Illu seg ul-ik d ixemmimen-ik d tezmert-ik, daɣen ad ttḥemleḍ lɣir-ik am yiman-ik.”
Nezmer a d-nini d wagini I d lsas n tudert. I yal amdan, I yal agdud, I yal lǧens. D zerriɛa yeṣfan. D leḥmala n Ṛebbi ara yfeggḍen deg ulawen. S leḥmala d lemqadra ara yessew wakal, ara tennerni tmurt.
