"Rret i Qayṣer ayen yellan n Qayṣer ! Rret i Ṛebbi ayen yellan n Ṛebbi !"
Nebɣa s weḍris-agi, a d-necɛel kra n tafat ɣef lameṛ n teflest d yidles. D aɣbel i yzemren ad yili d iɛewwiq i lefhama n tudert. Imi neẓra acḥal umgarad i d-yettilin di yal taswiɛt i deg nettmeyyiz deg ayen yeɛnan lumur n teflest s umata. Yewwi-d lḥal ur nxelleḍ ara ger wazal n teflest yellan d imani, i yal yiwen di tudert-is, d assaɣ n yiman aked Yillu i s-i-yumen, d wazal n yidles icudden ɣer tikta n umezruy, yeɛnan yal agdud yal lǧens.
Lsas n liman deg ul n wemdan, ur yelli d idles neɣ d ddin !
Iwakken a ɣ-yishil lamer-agini, di tazwara yewwi-d a neɛqel belli tamsalt n teflest, neɣ liman di Ṛebbi, mačči d tin icudden aṭas ɣer wazal n yidles neɣ n ddin s umata. Imi aṭas n deyyanat i yettabaɛen akter idlisen wala aẓar-nni kan n wassaɣ aked Yillu. Ɣas ulamma neẓra belli yal ddin a t-naf yettawi-d ɣef temsal n Yillu d lumurat-is.
Ihi, ticerkett tamezwarut ara d-nefsi, d tin yeɛnan, ddin si tama, aked taflest si tama nniḍen. Axaṭer, ddin yezmer ad yili d aɣelnaw, n tmurt, neɣ n lǧens s umata. Acḥal n tikal i deg ara t-naf icud aṭas ula ɣer temsal n tsertit d udabu. D timnaḍin n ddunit, d leǧnas s lekmal-nsen, ara nwali amek ṭṭfen di kra n ddin, armi yuqel d winna i d idles-nsen, alamma yuqel ahat d netta daɣen i d tasertit-nsen, yis i seddayen lumur n tmura-nsen. D adabu d idles d tadamsa d wayen akk yeɛnan tudert n ṭmeṭṭi-nsen. D amaɣrad ! Ma d ayen yeɛnan taflest, nettat ad teqqim kan deg iman n yal amdan, d ayen yeɛnan ul n wemdan, d assaɣ-ines ger-as d Yillu i s-yumen.
Lamsiḥ yezdi tagmatt ger yemdanen !
Si zik ar tura, a nwali amek tefreq ddunit ger leǧnas, s tsertit d imgaraden. Tefreq daɣen s tmuɣli n yidlisen yemxallafen. Deg udwil-agi, d ddeyyanat daɣen ara yilin am akken d tilisa tidelsanin, neɣ ahat d tilisa tisertayin i deg mqabalen yegduden, mxallafen. Tikwal alamma iwḍen ɣer umennuɣ d ṭrad. Timsirin n umezruy deg ayagi, uggtent !
Izen n Lmasiḥ, yusa-d ad ixalef akk tikta-yagi n ddin d leḥkem, d tikli n ṭmeṭṭiyin s umata.
Axaṭer, lebɣi n Sidi Ṛebbi ur yella ara d asbeddi n kra n ddin, neɣ n kra n leḥkem ara d-yersen d taɛṣirt ɣef yemdanen. Iswi n Lmasiḥ, ɣer tazwara, yeɛna leslak n yal amdan si ddnub, si tzemmar n cceṛ. Degmi, i d-yenna deg awal-is: " Rret i Qayṣer ayen yellan n Qayṣer ! Rret i Ṛebbi ayen yellan n Ṛebbi ! ". S imeslayen-agi, yenjeṛ-d Lmasiḥ abrid n tidett. Win yeɛnan leslak n yal amdan. D wagi i d azal, ar aẓar, n teflest. Taflest d assaɣ ger wemdan d Yillu. I leslak, i tudert n dayem. Degmi ur d-yewwi ara lḥal a nesserkem azal n teflest, n liman, aked wazal n yidles neɣ n ddin s umata.
