Azal n yeḍrisen n Tira
D acut wazal sɛan weḍrisen n Tira ? A d-nini amek alarmi uklalen a namen yis-n. D acut wazal-nsen i teflest ? D acu-t wazal-nsen amezray.
Kra n imusnawen n Tira d umezruy, qqaren-d belli, azal n Tira, ulamma n Lɛehd Ajdid, ur yebni ara kan ɣef udem d ufakul n umezruy s yiman-is. D acu n teswiɛt d zzman i deg d-uran yeḍrisen. D wamek i d-uran. Lameɛna, azal n Tira ad yebnu, di tazwara, ɣef uselmed-ines, yellan d tineqqisin, d imeslayen n Lmasiḥ s timmad-is.
Afakul n yizen s yiman-is !
TTazmert d wazal n Tira, ad ilin uɣen aẓar deg uselmed s yiman-is. Di lemtel, a d-neddem aselmed-nni d-yeǧǧa Lmasiḥ, yettusemman “ Aselmed n Wedrar”, neɣ iḍrisen nniḍen anda d-yeǧǧa akk lewṣayat-is i ynelmaden. D afakul n uselmed d yizen n Lmasiḥ i d lsas ɣef tebna tidett n Tira. Ur yelli d amezruy, neɣ d amkan, neɣ d kra n tikta-nniḍen, ara d-yefken i Tira n Lɛehd Ajdi tazmert-nsent d wazal-nsent.D Ṛṛuḥ n Lmasiḥ, d tazmert n Wawal-is, ara yefken ihi tissas d wazal i Tira.
Si tama nniḍen, afakul n umezruy a d-yernu s ufella. Ad yernu i tezmert d wazal n Tira. Axaṭeṛ, tidett n umezruy d nettat daɣen ara iɛawnen imdanen ad nadin di later d tikli. Ad nadin amek d-usan yeḍrisen meṛṛa n Tira. Ad nadin amek yella leqrar d laman n wayen akk ɣef d-ttmeslayent Tira. Laman n wid akk d-yuran, i d-yeṣṣawḍen titeggarin-nni meṛṛa, seg umkan ɣer wayeḍ, si lǧil ɣer wayeḍ.
A d-nini ihi, tidett n umezruy tettabaɛ tin n yizen-nni yellan di Tira. Akken yella Lmasiḥ ulla d netta. D Awal, d Ttidet, d Abrid, yusa-d ɣer yemdanen, iban-d deg umezruy n talsa. Izen-ines yuɣ-d aẓar di talsa, deg umezruy. Degmi Taflest tamasiḥit tṛeṣṣa deg umezruy, di tudert n yemdanen.
Tidett n umezruy trennu-d ɣef yizen !
Liman amasiḥi, d win yebnan ɣer tazwara, ɣef yizen n Lmasiḥ. D izen n “ Lexbar n Lxir”, d isallen yessefraḥen. D isallen yeɛnan leslak n yemdanen si ddnub d cceṛ. S tirza-ines ɣer ddunit, Lmasiḥ yesqerb-d tagelda n igenwan ɣer yemdanen, ɣer umezruy-nsen. Later n umezruy, a t-naf ihi, d ayen ibanen. Ulamma, di lawan n umenkud n ṛṛuman yellan yeḥkem timnaḍin-nni n usamar, di zzman-nni i d-iban Lmasiḥ, iɛac ger yemdanen. Ayagi d tidett n umezruy irennun deg azal n yizen.
Tagelda n Yillu tban-d s tedyanin meqqren, yellan d tid ɣef d-ttmeslayent Tira. Tidyanin-agi cuddent ɣer uselmed n lmasiḥ, taɣlift-is d yizen-is. D tidyanin ɣef yebna liman amasiḥi. D snesla n umezruy n leslak. D ahil n Yillu ara yesnekmal s Lmasiḥ. S tlalit-ines, s tezmert n Ṛṛuḥ n Ṛebbi, lmut-is d asfel ɣef umidag, ɣer tagara, ḥeggu-ines si ger lmeggtin. Ayagi meṛṛa yeḍra-d deg mezruy. Degmi, inezmer a d-nini belli afakul n umezruy yefka aṭas n tissas i wayen meṛṛa yellan di Tira.
