Adlisen n “Lexbaṛ n Lxir”. Neɣ “Linǧil”
Akken i ɣ-d-yewweḍ wedlis n Lɛehd Ajdid, akken i t-nessen, deg-s 27 n yeḍrisen yuran s tutlayt tagrigit. Yal aḍris yettusemma d “Adlis”. Nezmer a d-nini, xemsa-nni n yeḍrisen imezwura, d iḍrisen yuran s wudem n umezruy, deg-sen tidyanin d wussan d wayen yeḍran. D tidyanin n umezruy. Rebɛa deg-sen d wid yettusemman adlisen n “Lexbaṛ n Lxir”. Adlis n Marqus, Matta, Luqa d Yuḥenna. Yal yiwen deg-sen yettawi-d ɣef Linǧil, d isallen yessefraḥen, d izen i yemdanen yeɛnan tikci n Yillu. Tirza-ines ɣer ddunit. Ḥekkun-d amek i d-yusa Yillu ɣer yemdanen. Amek i d-ibeggen iman-is di Lmasiḥ iwakken ad isellek talsa si ddnub d tucḍa.
Adlisen-agi di rebɛa, deg-sen imeslayen d wayen akk yexdem Lmasiḥ. Ur sseɣzfen ara awal ɣef tmeddurt-is yakan. Akken i nezmer a t-naf di kra n yedlisen ɣef tmeddurin n iɣella d isertayen di lemtel. Aḥric ameqran n tira n yedlisen-agi ɣef Lmasiḥ, yella d ayen yeɛnan leqdic-ines d uselmed-ines. D taɣlift-is ara yawin ɣer wesfel-ines ɣef umidag d ḥeggu-ines ass wis tlata si ger lmeggtin. D ccan n wesfel n umidag I ɣef rran lbal-nsen yedlisen-agi ugar n wayen nniḍen.
Adlis wis xemsa, d win i d-yura Luqa, yellan d ṭṭbib, d ameddakel n Bulus. Yerna-d adlis-agi, d amezruy, d asefhem amek d-tebda tikli n inelmaden d usbeddi n tmezgida si tazwara. Yuɣ-d azal n tlatin iseggassen si tedyant n umidag. D adlis yettusemman “ Lecɣal n Yemceggɛen”. Deg-s a naf leqdic n yemcegɛen deg ṣiweḍ n “ Lexbaṛ n Lxir”, izen n leslak di Lmasiḥ. Yettawi-d ɣef yinigen-nsen, ladɣa wid n Bulus winna ara yuqlen d amceggeɛ ger leǧnas, yid-s daɣen ara yili umyaru n yidles-agi. Degmi ara d-ijerred akk tidyanin d yiniyen d uselmed n Bulus.
Tibṛatin d uselmed
Ma d iḍrisen nniḍen n Lɛehd Ajdid, d tibṛatin. 21 n tebṛatin, uran-tent yemcegɛen iwakken a d-sfehmen azal n Lexbar n Lxir n Lmasiḥ, d aselmed n teflest. Ger-asent 13 yura-tent Bulus. Seg-sent tid yura i tejmuyaɛ, i tmezgidiwin, azal n 9. Tabṛatt i Wat Ṛuma, snat n tebṛatin i Wat Kurintus, tabṛatt i Wat Galasya, tabṛatt i Wat Ifasus, tabṛatt i Wat Filibus, tabṛatt i Wat Kulus d snat daɣen i Wat Tisalunik. Ma d tiyyiḍ, yura-tent i kra n yemdukal-is. Snat i Timuti, yiwet i Tit, tayeḍ i Filimun.
Tella daɣen yiwet n tebṛatt yettusemman “Tabratt i Yiɛebṛaniyen”, deg-s ur d yura ara yisem n umyaru-ines. Kra qqaren ahat n Bulus s timmad-is. Yezmer lḥal tura kra n lweqt kan uqbel aseggas n 70. Teqsed kra n watmaten iɛebṛaniyen yellan di temnaṭ n Ṛuma.
Tella daɣen yiwet n tebṛatt i yura Yeɛqub. Izmer ad yili d gma-s n Lmasiḥ, si twacult-is. Tayeḍ daɣen yura-tt Yudas, ulad netta d gma-s n Yeɛqub, si twacult-agi. Buṭrus yellan seg inelmaden imezwura, netta daɣen yura-d snat n tebṛatin. Tlata nniḍen, ɣer tazwara ur itujerred ara deg-sent yisem n umyaru. D acu kan aḍris-nsent icuba aṭas ɣer tira d tikta n Yuḥenna. Yuɣ lḥal d anellmad-agi, yellan d uqrid ɣer Lmasiḥ, i d-yuran Adlis n Linǧil wis rebɛa. Degmi tibṛatin-agi ttusemmant d tid n Yuḥenna.
Adlis n Uweḥḥi
Adlis aneggaru n Lɛehd Ajdid d Aweḥḥi i d-yeǧǧa Yuḥenna. Icuba ɣer tsekla n zik, n At Israil d imasiḥiyen imezwura. Ayen yuran deg uḍris-ines d asbeggen sɣur Ṛebbi n wayen yellan d lesrar n tgelda-ines. Tagelda, tanaya n Lmasiḥ, tarennawt-ines. D aseǧhed n teflest n imasiḥiyen yellan ddaw teɛṣirt, iwakken ur feččlen ara, ad ṭṭfen deg usirem-nsen di Lmasiḥ. Adlis-agi yura ɣer tagara n lqeṛn amezwaru, ddaw leḥkem n twacult n “Iflaviyen” deg umenkud n Ṛṛuman.
