D ayen i d-yewwi lḥal a t-yefhem yal amdan yumnen s Lmasiḥ d amsellek-ines. Ayen akk icudden ɣer wazal n leslak di Lmasiḥ. Azal n tudert ddaw leɛnaya-ines d ṛṛeḥma-ines. Yal amasiḥi ad yili d win yumnen s Ṛebbi yeddren win ixelqen igenwan d lqaɛa d wayen akk yellan deg-sen. Tudert akk sɣur Yillu i d tekka yerna ɣer ɣur-s ara tuɣal.
D Ṛebbi i d-ixelqen amadan. Ixleq-it-id ɣer ṣṣifa-ines. Ad yili di tudert yedduklen yid-s. Ɣer tazwara yella yettidir wemdan deg assaɣ aked Ṛebbi s talwit d rrezg. D acu kan yuqel wemdan yeɣli di ddnub, yecceḍ. Degmi yuɣal yettidir yebɛed ɣef leɛnaya n Ṛebbi. Tekcem-it tugdi yuɣal ur yeɛqil ara lebɣi n Yillu i tudert-is. Yuqel iteddu yettmenṭar yerwa ccwal d imenɣi. Texreb tdukli-nni yella yesɛa aked Ṛebbi. Terna daɣen texreb tdukli-ines ger-as d wemdanen aked d-yettɛici.
Talsa teɣli di ddnub
Ddnub yewwi-d arway n talsa s umata. Tudert n yemdanen tuqel d axrib meqqren. D imenɣan d laẓ d uqehher. Seg ass mi yeɣli wemdan di ddnub i truḥ lbenna i ddunit.
D acu kan Sidi Ṛebbi si tazwara yessers-d lweɛd-is i yemdanen. Yeṭṭef lqsed iwakken a ten-isellek. S wawal-is d lewṣayat-is yerza-d s lmalayek-ines d imcegɛn-ines acḥal n tikal iwakken a d-yeṣṣiweḍ asirem i wemdan; a s-d-yemmel abrid yessufuɣen. D leǧyal n lenbeyya d imcegen i d-yusan ɣer ddunit ttawin-d lweɛd sɣur Ṛebbi. D lewṣayat-is d wawal-is.
Leslak ittuxebbeṛ-d deg mezruy
Si Leǧyal imezwura, wid i wumi neqqar imɣaren n talsa. Si zzman n Nuḥ alamma d talit n Yebṛahim, Ṛebbi yessers-d lemeahda i leslak n wemdan. D tiɣri n leslak-nni ara d-yasen di lweqt i d-ihegga di tnaya-ines. Awal d uṣaḍuf-ines, a ten-id yefka i yemdanen s yimi n lenbeyya-ines i d-iwekkel a d-mmeslayen i ddunit. Si Musa alamma d Yeḥya aɣeṭṭas, Ṛebbi i hegga-d awal-is d lemɛahda-ines i leslak n yemdanen.
Aẓeṭṭa-yagi n lemɛahda ad yennekmal s Lmasiḥ. Netta iban-d di lweqt i d-yessewjed Yillu, iwakken ad yili d asfel-nni zeddigen ara yettunefken i leɛfu n ddnubat n yemdanen meṛṛa.
Ass wis tlata ad yeḥyu si ger lmeggtin, yerna ad yeṣṣiweḍ ɣer lekmal leslak n wid me;rṛa yumnen yis d amsellek-nsen d ssid-nsen. Lmasiḥ d Mmis n Ṛebbi. Ad isellek wid meṛṛa yextar ad ilin d ayala-s, ad ttusemmin ula d netni d arraw n Ṛebbi.
Tudert s Ṛṛuḥ aked Lmasiḥ
S Ṛṛuḥ-is iqedsen i ysedday tudert n wid akk yemnen yis. Yettḥarab fell-asen ittweṣṣi-ten yettwellih-iten. S wawal-is yellan d tidett i yesnernay di liman-nsen iḥerz-iten di tidett.
Lweɛd-ines d tidett. Imi yemmut d asfel i leɛfu n ddnubat, yeḥya-d ass wis tlata si lmut, ɣer tagara a d-yuɣal ad isbedd tagelda n Yillu i dayem.
D Lmasiḥ i d tazawara i d tagara. D netta i d abrid n leslak. D netta i d amsellek. S Ṛṛuḥ-is d Wawal-is i ysedday tudert n yal yiwen.
