Ussan-agi iɛeddan yessaɣ wedfel ɣef tmurt n Leqbayel am akken d igenni i d-yeɣlin yerkem fell-as. Iberdan akk reglen. Tudrin d yexammen ɣummen “ddaw tmedlin” n wedfel. Aṣemmiḍ igezzem iɣsan. Deg akken qeṣṣiḥ wedfel, deg akken ugten waman d-yeɣlin, ula d akal iseggex, armi raben ula d ixammen. Qqiment akkenni twaculin mebla ssqef mebla aseḥmu. D tadyant umi ara necfu.
Zdat wagai meṛṛa, ayen i qeṛṛḥen aṭas imesdurar-nneɣ, d tuzya-nni s waɛrur, i tezzi lḥukuma n tmaneɣt ɣef lḥif n tudrin. Am akken ur d-yeḍri wara. Ayagi yeǧǧa-d deg ulawen urrif d zzeɛf meqṛen. D acu kan nnumen imezdaɣ n tudrin-nneɣ s tidderɣelt-agi. Mačči armi d ass-agi i d-ufan iman-nsen weḥḥed-sen zdat tilufa. Ama d tid d-yekkan seg gama neɣ d tid n yemdanen.
Tagmatt, tiwizi !
Afus n lemɛawna ufant-t ger-asen. Yal wa s tezmert-is, s wul-is. Yal taddart texdem ayen umi tezmer iwakken a tteṣṣer lexṣaṣ n imezdaɣ-is. S tdukli d wul i bedden imesdurar ad ṛṛẓen asalu. Ula d imezdaɣ yettilin beṛṛa n tudrin-agi izedlen ddaw wedfel, kkren-d iwakken a d-ɛiwnen s wayen umi zemren. Jemɛen-d ayen iwulmen, ḥunen-d ɣef watmaten-nsen i yḥeṛ wedfel d uṣemmiḍ.
Akken neqqaṛ s teqbaylit: “ Tiyyita ! d tiyyita ! ma d ajebbaṛ d axellaq ! ”. Nebɣa daɣen s wawal-gi ara neṛṛeẓ asalu nniḍen. A d-nesmekti i tudrin-nneɣ d akken Ṛebbi ur ɣ-iǧǧa ara. Yella yid-neɣ, yettɛassa fell-aneɣ. D netta i d rrezg, i d leslak. Igenni d lqaɛa d ayla-yines. Aman sɣur-s, tudert sɣur-s.
Di teswiɛin am tigi qessiḥen, ayen umi ur yezmir wemdan, ayen d-ikkan ẓẓay, d taɛkemt i yal yiwen, ur ntettu ara belli yella “Win” izemren i kullec. Yella “Win” yellan d asirem i yal yiwen. Netta iɛuhed-aneɣ ur ɣ-ittaǧǧa ara. A d-yazen leslak-ines d ṛṛeḥma-ines i yal yiwen. D netta i d Bab n txelqit, ɣur-s tazmert ɣef kullec. Akken yura deg Hellilen:
Yesbur tafat am ubidi, iḍleq igenwan am wahin !
Yesbedd lebṛuj-is ɛlayen nnig waman, irra asigna d akeṛṛu-is, iteddu ɣef wafriwen n waḍu, irra aḍu d amceggeɛ-is, iḥeǧǧuǧa ntmes d iqeddacen-is. Yessers lqaɛa ɣef lsas-is, tṛeṣṣa i dayem. Tɣummeḍ-tt s igarawen am llebsa, aman kkan-d nnig n idurar. Zdat n usigged-ik rewlen, si ṣṣut n rrɛud-ik uzzlen. Ttalin ɣer idurar, ttadren ɣer iẓuɣar alama d amkan i sen-theggaḍ. Terriḍ-asen tilisa ur zeggren ara, iwakken ur d-ttuɣalen ara ad ɣummen lqaɛa. Yessufuɣ leɛwanṣer ɣer iceṛcuṛen, ttazzalen ger idurar. (Ahellil 104: 2-10)
Mi ara d-nemmekti tazmert n Yillu, tidett n wawal-is, yettnecṛaḥ wul tettrusu-d lehna di tudert-nneɣ. S imeslayen-agi i nebɣa a neṣṣiweḍ sslam-nneɣ d usirem-nneɣ,
s lehna d laɛnaya i yal yiwen.
