D adlis aqdim i d-uran iqeddacen n Dawed d yemyura nniḍen i yɛerḍen a d-snejmaɛn meṛṛa tiẓilla d ccnawi. D izlan i s icennun tayri n Ṛebbi d leslak-ines i d-yefka i wid yumnen yis, itteklen fell-as. Ar aas-a timezgidiwin meṛṛa deɛɛunt cennunt s “Ihellilen”. Tikta n ihellilen s umata, d taẓallit d leḥmadi. D aɛenni ɣer Yillu. Azal-nsen di Tira d alemmas. Sseǧhaden di liman rennun-as deg afud.
Azal n 150 n ccnawi d isefra. D icewwiqen n ṛṛuḥ. Ttalin-d deg ulawen n wid meṛṛa yettḥemmiden tamanegt n Yillu. Ssalayen di ccan-is s ihellilen-agi. Ttuɣalen-d aṭas di Lɛehd Ajdid, deg imeslayen n Lmasiḥ s timmad-is. Deg-sen aselmed d umezruy n Tira. Deg-sen daɣen tuggett n teswiɛin yemxallafen i deg ttɛicin yemɣaren n wat Israil d lanbiyya. Yal ahellil s imeslayen-is d tiktiwin-is.
Amezruy n ihellilen
Amur ameqqran deg-sen ttawin-d ɣef ddeɛwat d tiẓilla n Dawed. Llan daɣen aṭas n yemyura nniḍen. Gar-asen a d-nader, arraw n Quraḥ, Sliman yellan d mmi-s n Dawed, acennay ameqqran yettusemman Asaf, Himan, Itan, Zakariya d wiyyiḍ. Di lemtel a naf ula d taẓallit n Musa deg yiwen seg ihellilen-agi. Nnejmaɛen-d akk iwakken ad bnun yiwen wedlis ara yilin d win n leḥmadi i Yillu. Deg ul n tugett n ihellilen-agi, ad ilin wid ara d-yegren tiɣri ɣer wazal n Lmasiḥ. Deg-sen am akken d licarat i Lmasiḥ-nni ara d-yasen i leslak n yemdanen. D tiɣri i leslak-nni i d-yewɛed Ṛebbi i wat Israil, yerna ara yilin daɣen d leslak i yegduden n ddunit meṛṛa.
Asirem n ihellilen !
Iban-d Lmasiḥ ɣef d-ttawin ihellilen d agellid (Ahellil 2). Ḥekkun-d ula ɣef leɛtab ara yenneɛtab ara yettwaqher ( Ahellil 22, Ahellil 44). Amedya n uhellil wis 16, deg-s awal ɣef lmut d ḥeggu n Lmasiḥ. D licara ɣef teɣlift-is, d wesfel-ines i leslak n yemdanen. Imi d Tira iqedsen, azal-nsen d aṣṣiweḍ n leslak i yemdanen. D Lmasiḥ ara d-yasen ad yefk iman-is d asfel i leɛfu n ddnubat n yemdanen. Am akken yella usirem deg ihellilen skud ttadren-d Lmasiḥ d leɛtab-ines.
Ahellil wis 68 di tseddart 19, yemmeslay-d ɣef walluy n Lmasiḥ ɣer igenni. A d-ncud ayagi ɣer lexbar n lxir yellan di Linǧil. Akken yella deg umezruy, Lmasiḥ yekker-d si ger lmegtin, iban-d i yemdanen, yeǧǧa-yasen ttbut n leslak i yesnekmal s wesfel-ines ɣef umidag. Yerna iwweṣṣa inelmaden-is ad ṣṣiwḍen tiɣri-ines i leǧnas meṛṛa. S leqraya n uhellil-agi ara d nemmekti tidett d ttbut n Lmasiḥ yellan d amsellek.
Ayagi ad aɣ-yawi iwakken ad ǧǧuǧgent deg-nneɣ tissas, a nesbed asirem deg ulawen-nneɣ. Imi tiɣri n ihellilen i d-icergen leqrun d zzman, d tin n ḥeggu n Lmasiḥ. Yebna wayagi deg umezruy. D ayen ɣer ssaramen imezwura. Imi tidyanin n ihellilen d tid-nsen. D tiswiɛin deg ttidiren. Ama d lferḥ ama d lqerḥ. D anezgum d ixemmimen, d lehna neɣ d ṭrad. Di yal taswiɛt tiẓilla n ihellilen deɛɛunt ɣer leslak ara d-iceggaɛ Yillu i wegdud-is. Ma nessaked, Ihellilen d asirem d tiɣri n leslak.
