Deg ussan-agi iɛeddan, ɣer tagara n waggur n magu, d asmekti, d lɛid-nni i deg d yers Ṛuḥ iqedsen ɣef inelmaden imezwura n Lmasiḥ. A d-nini d tazwara n tikli n tmezgida. D agraw amenzu n temlilit-is. Si lmut n Lmasiḥ ɣer ḥeggu-ines, d walluy-ines ɣer igenni. Kra n wussan ɣer zdat, azal n xemsin wussan, yellan d ass n « lɛid n tmegra » deg umezruy n wat Israil. Ass-nni yeḍra-d wayen ara yefken tikli-ines i umezruy n tmezgida, ar ass-agi.
D ass ifazen aṭas deg mezruy n tmezgida di ddunit meṛṛa. D acu kan, iwakken ur d-yettɣimi ara kan d ansay, ass a t-id-nemmekti, ass nniḍen ahat a t-nettu yakan, yewwi-d lḥal a nessiked ɣer tedyant-agi, iwakken a nmeyyez deg-s, a d-nemmekti s wazal n Tira, azal-is ɣer lsas.
Yuɣ lḥal, Lmasiḥ, uqbel lmut-is d ḥeggu-ines, yeǧǧa-d lameṛ i ynelmaden-is, yenna-yasen, ad raǧun kra n wussan, imiren ad ters fell-asen tezmert seg igenwan. S tezmert-nni ara qablen tudert, ara yuɣalen d inagan iṣeḥḥan, i wesbeddi n tmezgida.
Nezmer a d-nɣer ayagi di adlis n « Lecɣal » :
« Mi d-yeḥya si ger lemegtin, i nutni daɣen iwumi i d-isban iman-is belli yedder. Ṛebɛin wussan netta ittban-asen-d, yerna ittmeslay-asen-d ɣef ayen yeɛnan tagelda n Ṛebbi. Yiwen wass, mi gella itett yid-sen, yefka-yasen lameṛ-agi: ur ttefɣet ara si temdint n Yirucalim, lameɛna ṛǧut lemɛahda n Baba Ṛebbi, tin akken i wen-d-nniɣ. Yeḥya isseɣḍas imdanen deg aman, ma d kenwi, di kra n wussan a ttettwaɣeḍsem s Ṛṛuḥ iqedsen. »
D tadyant-agi n trusi n Ṛṛuḥ ɣef inelmaden imezwura, ara yilin am akken d aẓru amenzu i lebni d uṛeṣṣi n tmezgida di ddunit meṛṛa. D tadyant ara d-yeṭfen aẓar si temdint n Yirucalim. Yeḍra-d wayagi, yerna dinna ḥeḍren yemdanen i d-yusan seg aṭas n tamiwin n ddunit. Llan dinna ula d kra n imezdaɣ n tmurt n Libya, yellan d tamurt n Tmazɣa. Slan yerna walan ayen akk d-ilulen dinna ger wat Israil. Slan s leɛǧayeb d tezmert n Lmasiḥ i d-yeḥyan si ger lmegtin. Slan i lexbaṛ n Lxir ara yawḍen ɣer ddunit meṛṛa.
Deg ass n lɛid wis xemsin, llan nnejmaɛen inelmaden deg yiwen n wamkan, taswiɛt kan, yekka-d yiwen n lḥess ameqqran seg igenni am aḍu iǧehden, yeččuṛ akk axxam-nni anda qqimen. Uqlen ččuṛen akk s Ṛṛuḥ iqedsen, bdan ttmeslayen s tutlayin nniḍen, yal yiwen deg-sen iheddeṛ s tutlayt i s-d-ifka Ṛṛuḥ iqedsen. “ Lecɣal”.
Daɣen deg ussan-nni, akken ara t-nɣer di Tira, deg adlis-agi n « Lecɣal », aṭas n yemdanen i d–yusan si tmura nniḍen, yuɣ lḥal sellen i yinelmaden ttmeslayen s tutlayin-nsen yellan d tibeṛṛaniyin i wat Israil. Degmi i tɛjben deg ayen iwumi sellen. Qqaren wager-asen, “ Amek armi yal yiwen deg-nneɣ isell-asen ttmeslayen s tmeslayt-is? ”. Azal-is, d akken lexbaṛ n lxir a s-slen yemdanen n ddunit meṛṛa. D wagi i d sser. D lɛid i yal amdan. D asirem i yal tudert.
