Taflest, akken i s-qqaren watmaten-nneɣ imucaɣ (twareg), neɣ Liman deg Illu, d laman deg-s s yiman-is d wayen akk ixeddem. Taflest d azal n wul.
Ad nini ihi, taflest n wul. Amakken d nettat I d tinettit n wemdan yumnen yesɛan lettkal deg Illu-ines.
Taflest d ttbut yellan deg ul. Mačči d kra n tmusni izaden. Mačči daɣen d axeyyel n kra n lumuṛ ur nettissin.
Lamaɛna taflest d azarag-nni n tafat icceɛcɛen deg ul, yessaɣ tafat, d ttbut i terwiht s lekmal-is . Ama d rruḥ, neɣ d ixemmimen ama d ul ama d taɣzint d leɛqel. D ṭṭmana n terwiht.
Tafat-agi icceɛcɛen deg ul, tekka-d si temlilit ger wemdan d win i t-id-ixelqen. D timlilit n terwiht aked win akken yellan d lɛinṣar, d aɣbalu, n yal tudert.
Netta d win yellan! Akken i s-semman imezwura-nneɣ "Imaziɣen": Illu. Anamek-is d win akken yellan.
Nezmer ad nini s wawal nniḍen, d netta yakan i d aɣbalu n teflest. Acku d netta ara tt-yeẓẓun deg ulawen. D netta diɣent ara tt-yesswen ara tt-yesǧuǧgen iwakken ad tegmu.
S wudem n Tira Iqedsen, Adlis n Tira, a nefhem taflest am akken d allal neɣ ttawil i yis yeqbel wul n wemdan tarzeft n leslak d yekkan sɣur Yillu. Akka ara d tbin temlilit ger wemdan d win i s-d-ifkan asuref d laɛfu.
Ad nini ihi d taflest di Rebbi, Illu yeddren, netta d yefkan leslak, s wesfel n Lmasiḥ.
Isbed lemɛahda i leslak n kra n win ara yamnen ara yesɛun laman deg usfel n Lmasiḥ.
Asfel n Lmasiḥ d ḥeggu-ines si ger lmegtin, d sin wazalen i ɣef tbedd teflest. Imi d taflest i leslak. Tudert n wemdan, asirem-is, d ayen icudden ɣer teflest.
D taflest i tudert. Tudert yesɛan anamek d usirem !
