Adlis n Tira iqedsen yettawi-d ɣef Ṛṛuḥ Iqedsen yellan s nettit-ines d Ṛṛuḥ n Ṛebbi, d Illu s yiman-is. Sɣur-s I d-tekka yal tudert. Imi ayen akk I d-yexleq Ṛebbi, ixleq-it-d s Ṛṛuḥ-is. Linǧil daɣen yeqqar-d deg awal-is, Ṛṛuḥ Iqedsen s yiman-is d Ṛṛuḥ n Lmasiḥ. Yettusemma d imqeddes, d netta I yessizdigen tudert n yemdanen. Yettheggi ulawen-nsen d ixemmimen-nsen, ixeddem deg-sen. D Ṛṛuḥ n Ṛebbi s tezmert-is meṛṛa.
Amek I yxeddem Ṛṛuḥ iqedsen di tudert n wemdan?
Yemmal-d abrid s tafat. Imi ɣlin akk yemdanen di ṭṭlam n ddnub. Deg yiwet si tebṛatin-is yenna Bulus : “ Lefhama-nsen iɣumm-itt ṭṭlam, sbeɛden iman-nsen ɣef tudert I d-ittak Sidi Ṛebbi axaṭer jehlen, qquren wulawen-nsen.” Ur feṛṛzen tafat ur ɛeqqlen tidett. Beɛden ɣef Ṛebbi. Tasarut ihi, d Ṛṛuḥ n Ṛebbi I d-yattasen ɣer wul n wemdan, yessazdag lefhama-s s wawal n tidett.D Ṛṛuḥ ara t-yessfiqqen ad ibeggen deg ul-is tidett yellan di Tira yellan d “Awal yeddren”. S Wawal-is I d yettweḥḥi ara ybeddel ixemmimen d lefhama n yal amdan. Degmi yettusemma “Wawal” di Tira iqedesen : “Ajenwi n Ṛṛuḥ”. Igezzem yeqḍaa. Ad yexdem deg ul n wemdan ar aẓar, s leqyat.
Yettak-d ttbut s tidet, s tezdeg. Iwakken yal amdan ad yeɛqel liḥala deg yella. A d-yawi s lexbaṛ belli yuḥwaǧ ɣer leslak. Yura di Tira, di Linǧil n Yuḥenna: “ M’ara d-yas, a d-isbeggen i yemdanen belli ɣelṭen ɣef wayen yeɛnan ddnub, lḥeqq, d lḥisab n Ṛebbi.” D wagi I d leqdic n Ṛṛuḥ deg ul n wemdan. A s-d-ibeggen s tidett liḥala n ddnub I deg yella. S tafat-is a d-yessers deg ul-is ṭṭmana n Ṛebbi d ṛṛeḥma-s. Iwakken a s-yeɛfu a t-yessizdeg si yal ddnub. Ayagi akkit sɣur Ṛebbi I d-yekka.
S Ṛṛuḥ iqedsen I nezmer a nefhem lesrar akk yellan di Tira iqedsen. Ṛebbi d Ṛṛuḥ. Yettak-d tazmert I lefhama I liman. D netta I d-yettaččaren ul n wemdan s tudert d ṭṭmana. Yemmal-d ayen akk I wulmen I tudert d liman. Yesǧuǧǧug taflest d usirerm!
