D ayen i d-yewwi lḥal a t-yefhem yal amdan yumnen s Lmasiḥ d amsellek-ines. Ayen akk icudden ɣer wazal n leslak di Lmasiḥ. Azal n tudert ddaw leɛnaya-ines d ṛṛeḥma-ines. Yal amasiḥi ad yili d win yumnen s Ṛebbi yeddren win ixelqen igenwan d lqaɛa d wayen akk yellan deg-sen. Tudert akk sɣur Yillu i d tekka yerna ɣer ɣur-s ara tuɣal.
Yeqqim akken i laẓ i fad, s tiyyita d rregmat. Yerna sbubben-as amidag-nni i ɣef tsemmṛen. Ulayɣer d nenna acḥal iqeṛṛeḥ usemmer-nni ɣef umidag. Yerna ayenni meṛṛa di lbaṭel. Deg ass-nni, yeɣli-d ṭṭlam deg zal. Tewwet zlezla di Yirucalim. Iẓekwan llin. Ffɣen-d ula d lmeggtin. Ayagi yeṣṣaweḍ yiwen userdas n Ṛṛuman ad yini : « S tidett aragaz-agi d Mmis n Ṛebbi ! » Uqbel ad yessufeɣ taṛwiḥt, yenna-d Lmasiḥ kra n imeslayen yesɛan azal i leslak ara yennekmalen s wesfel-ines.
Tira iqedsen, ama d lɛehd ajdid ama d lɛehd aqdim, d awal d lewṣayat d yeǧǧa Yillu i yemdanen. Ayagi meṛṛa yennejmaɛ-d deg yiwen n wedlis yettusemman Adlis n Tira Iqedsen. S tefransist qqren-as i wedlis-agi, "La Bible". D ameslay i d-yekkan si tegrigit d tlaṭinit, "Biblia". Anamek-ines, "Adlis".
Tinettit n Lmasiḥ d tin icudden ɣer wayen yellan di Tira iqedsen. Imi di Tira ara naf ayen akk i t-yeɛnan. Talalit-ines ɣer ddunit s Ṛṛuḥ iqeden, tudert-is meṛṛa yellan d tin yennekmalen s tezdeg d tmusni. Leɛqel-ines yennekmalen i deg ulac akk kra n lexṣaṣ. Iɛac ger yemdanen mebla ddnub. Yeččuṛ s Ṛṛuḥ Iqedsen. Lecɣal-is d ixemmimen-is rekmen s leqdasa n Ṛṛuḥ.
Adlis n Tira iqedsen yettawi-d ɣef Ṛṛuḥ Iqedsen yellan s nettit-ines d Ṛṛuḥ n Ṛebbi, d Illu s yiman-is. Sɣur-s I d-tekka yal tudert. Imi ayen akk I d-yexleq Ṛebbi, ixleq-it-d s Ṛṛuḥ-is. Linǧil daɣen yeqqar-d deg awal-is, Ṛṛuḥ Iqedsen s yiman-is d Ṛṛuḥ n Lmasiḥ. Yettusemma d imqeddes, d netta I yessizdigen tudert n yemdanen. Yettheggi ulawen-nsen d ixemmimen-nsen, ixeddem deg-sen. D Ṛṛuḥ n Ṛebbi s tezmert-is meṛṛa.
Awal-agi n umasiḥi icud yer yisem n Lmasiḥ s yiman-is. Si tazwara ttusemman inelmaden imezwura s yisem-agi, d imasiḥiyen, deg adlis n Lecɣal n yemcegɛen. D wid i ten iwalan amek ttabaɛen Lmasiḥ d uselmed-ines, i sen yefkan isem-agi. A naf a yagi deg Adlis-agi i d nebder, deg ixf wis 11 taseddart tis 26.
Deg ayen akk i d-yexleq Yillu, deg igenwan d lqaɛa, di tudert meṛṛa, mačči ḥala imdanen i yellan s tegzi d leɛqel. Tira iqedsen ttmeslayent-d aṭas ɣef txelqiyin nniḍen, yesɛan tigzi, yettilin deg genwan, ccɣel-nsent d leqdic zdat Yillu. Ṣṣawaḍent ɣer Yillu aked txelqit-ines s umata. Ccɣel n txelqiyin-agi, d timceggɛin ger Yillu aked txelqit-ines.
Leqraya n Tira iqedsen mačči alamma s tmusni meqqren. Yal yiwen yezmer a d-yejbed sseg-s ayen i t-iwulmen di tikli-ines di liman. S tidett, Adlis n Tira d win yuran acḥal n leqṛun, acḥal n tsuta n yemyura i yjerden deg-s. Yettawi-d aṭas ɣef umezruy d teglest taqdimt. Nezmer a d-nini belli kra n tmusni n umezruy ahat ad tɛawen di lefhama n kra n lumuṛ ɣef d-yettawi wedlis-agi; d acu kan, izen n Tira netta yeqqim-d i yemdanen meṛṛa, si yal lǧens d yal lawan. D Adlis ara nɣer s liman s lettkal. Imi deg-s ayen akk yewɛed Yillu i leslak n yemdanen.
D ayen yexdem Lmasiḥ ɣef umidag, asfel-ines, i yefkan i wemdan ttawil i s ara iqeṛṛeb ɣer ṛṛeḥma n Yillu. Ɣer umidag i yeqsed Ṛebbi ad yemlil d wemdan yellan d amednub yakan. Idammen n Lmasiḥ yuzzlen d asfel ad ssirden ddnub n wemdan taswiɛt i deg ara yeqbel asfel-nni i tudert-is d leslak-is. Ad nass ɣur-s a neqbel tikci-ines n ssmaḥ d leɛfu. Akka i yella di lebɣi n Yillu mi d-yefka Lmasiḥ d asfel i ssmaḥ.
Tikta i nezmer a nessiked ɣur-s mi ara nɣer di Tira d tin n wassaɣ yellan ger Yillu d wemdan i d-ixleq. A nger tamawt ɣer yixf wis sin di “Laṣel n ddunit”, taseddart tis sebɛa. Degs a nwali, amek d-yemsel Yillu tafekka n wemdan seg uɣebbar n wakal. D acu kan, amdan mačči kan d tafekka i deg-s. Akken t-id yexleq, yefka-yas ula d tarwiḥt, nnefs n tudert, tigzi aked leɛqel. D talsa, temxallaf d iɣersiwen d ugama.
Lmasiḥ yusa-d ɣer ddunit i leslak n yemdanen. Yettwaḥbes yerna ḥekmen fell-as s lmut imeqranen n ddin n wat Israil di lawan-nni. Cehden fell-as s rregmat di ddin-nsen. Imi, di lbal-nsen, yeḥseb iman-is d Ṛebbi. Deg ṣuḍaf-nsen d ayen yettawin ɣer lmut. Degmi yettwasemmeṛ ɣef umidag s ufus n ṛṛuman yellan ḥekmen tamurt.
Tira meṛṛa di Lɛehd Aqdim deg-sent licarat yeɛnan Lmasiḥ. Win akken ara d-yasen d amsellek n ddunit. Tuggett n lenbeyya i d-yemmeslayen fell-as. Tuggett n “ymeɣaren n talsa” yellan di Tira, tudert-nsen d lecɣal-nsen d azamul d tiɣri n Lmasiḥ. Aṭas n tedyanin ɣef d-ttmeslayen Tira ara ɣ-d-ibanen am akken d “tidyanin n leslak”.
D adlis aqdim i d-uran iqeddacen n Dawed d yemyura nniḍen i yɛerḍen a d-snejmaɛn meṛṛa tiẓilla d ccnawi. D izlan i s icennun tayri n Ṛebbi d leslak-ines i d-yefka i wid yumnen yis, itteklen fell-as. Ar aas-a timezgidiwin meṛṛa deɛɛunt cennunt s “Ihellilen”. Tikta n ihellilen s umata, d taẓallit d leḥmadi. D aɛenni ɣer Yillu. Azal-nsen di Tira d alemmas. Sseǧhaden di liman rennun-as deg afud.
Amek i tettnerni teflest deg ul n yal amdan?
Azal amezwaru n liman d lmasiḥ s yiman-is. Yis ara yamen yal amdan yernu ad yessers lettkal-is deg-s, deg awal-is d laɛanaya-ines. Liman ad yeẓẓu deg ul n wemdan s ṛṛeḥma n Ṛebbi. D tikci n igenwan. Abrid n liman, d abrid aked Lmaṣih yellan d Ssid d amsellek. Ad yemlil wemdan s leḥmala d ṭṭmana yellan di Lmaṣiḥ. Ṭṭmana d lettkal di leslak d leɛfu n ddnubat. D lmasiḥ, s wesfel-ines ɣef umidag, s ḥeggu-ines si ger lmegtin, i s-d-yewwi lḥal a namen, a nessers lettkal-nneɣ deg-s.